Eyavugisa ekimama n'atomera omuntu n'afa bamusibye omwaka mulamba!
OMUSAJJA eyavugisa ekimama n’atomera omuntu n’afa ate nga yali talina ppamiti gumusse mu vvi, kkooti emukalize yeebake mu kkomera e Luzira okumala mwaka kimuyambe okubeera ow’obuvunaanyizibwa ng’akozesa ekkubo okutambulira abalala.
Muyingo mu kkooti
OMUSAJJA eyavugisa ekimama n’atomera omuntu n’afa ate nga yali talina ppamiti gumusse mu vvi, kkooti emukalize yeebake mu kkomera e Luzira okumala mwaka kimuyambe okubeera ow’obuvunaanyizibwa ng’akozesa ekkubo okutambulira abalala.
Isma Muyingo 31, makanika ng’abeera Makindye y’abadde avunaanibwa mu kkooti ya Nateete Lubaga e Mengo emisango esatu okubadde ogw’okuvugisa ekimama, okutomera n’aleetera omuntu okufa ssaako n’okuvuga nga talina pamiti era gyonna gimumezze, omulamuzi Adams Byarugaba n’amusalira kusibwa ku meere.
Emisango gino yagizza nga May 16, 2021 e Mutundwe bwe yali avuga mmotoka Toyota Collora G-Touring UAE 702Z n’atomera abavuka basatu abaali ku ppikipiki bwe yali agezaako okuyisiza ku mukono omukyamu era omu ku bavubuka bano Hussein Muwonge yafa enkeera ng’atwaliddwa mu ddwaliro e Mulago.
Mu bajulizi bataano abaawa obujulizi kkooti beeyesigamyeko okuwa ensala yaayo mwe mwabadde ne Sarah Nalwanga nnyina wa Muwonge eyategeeza nti baamuteegeza ng'ali Masaka nti mutabani we afunye akabenje era n’asitukiramu n’amusanga e Mulago enkeera n’afa wabula yalaajana nti yamulekera amabujje gaalabirira.
Muyingo bwe yaweebwa omukisa okwewozaako teyalayira ekitegeeza nti obujulizi bwe yali awa bwali tebukola nnyo makulu era yategeeza nti si ye yali avuga n’agamba nti eyali avuga ayitibwa Kafeera nga yadduka oluvannyuma lw’akabenje wabula ebbanga lyonna okuva 2021 yalemererwa okumuzuula ekitegeeza nti yali alimba.
Bw’abadde awa ensala ye, omulamuzi Byarugaba agambye nti teri muntu yenna ava waka ng’azze kukola kabenje era okufa kuba kufa wabula engeri gy’okozesaamu ekkubo kikulu nnyo, okufaayo eri abalala abalukozesa.
Ategeezezza nti ono tabadde mwetowaze era amalidde kkooti ebiseera ate ng’akimanyi bulungi nti yazza omusango, n’amusindika mu nkomyo kimuyambe okubeera ow’obuvunaanyizibwa era akyali muvubuka muto aky’asobola okukyusa.
Ku musango gw’okuvugisa ekimama n’obutaba na ppamiti amukalize emyezi mukaaga buli gumu ssaako n’okutomera n’atta omuntu mwaka mulamba ng’ebibonerezo byakutambulira wamu.