Omukazi agambibwa okutulugunya ebbujje ly'azaala bamuwendulidde poliisi

ABATUUZE bawendulidde munnaabwe poliisi nga bamulanga kulagajjalira omwana ow’omwaka ogumu n’ekitundu  gwe baasanze n’ebiwundu mu bitundu by’ekyama nga n’endabika ye eraga tafuna bya kulya.

Olivia Muhindo 32, omutuuze  mu Dobi zzooni e Kawempe yakwatiddwa poliisi y’oku Kaleerwe oluvannyuma lwa baliraanwa be okumuloopa nga bw’aludde ng’atulugunya omwana we ow’omwaka ogumu n’ekitundu ng’omwana yasangiddwako n’ebiwundu  mu bitundu by’ekyama.

Muhindo (asooka Ku Kkono) N'abatuuze Abaamuloopye.

Wabula,Muhindo zino yaziyise mpalana za mizigo. Ester Kisakye yagambye nti bo tebalina mpalana na Muhindo wabula  baludde nga balaba embeera omwana gye bamuyisaamu si nungi.

Muno mubaddemu okumukuba , obutamuwa kyakulya mu budde ssaako okumuleka nazannyira mu bifo ebicaafu nga ku luno baamuggye mu mwala ekyabawalirizza ensonga okuzitwala ku poliisi.

Olugalo Lw'omwana Oluliko Ebbwa Eriteeberezebwa Okuva Ku Kukuba.

Yagasseeko nti Muhindo omwana amulekera muganda we eyeesuuliraayo ogwannagamba okumulabirira ng’ekyasinze okubeewuunyisa ye Muhindo okubavumira mu maaso g’abasirikale ng’abalanga okuyingirira ebitabakwatako.

Muhindo eyabadde tasalikako musale obwedda  ayogera olukonjo n’oluganda yagambye nti omwana tewali amubonyaabonya wabula yamuzaala n’obulwadde bwe yayise Zawadi mbu era bwe bwamukuba amabwa mu bitundu by’ekyama.

Akola ku nsonga z’amaka ku poliisi y’oku Kaleerwe yavudde mu mbeera n’atabukira Muhindo namubuuzza lwaki omwana bw’aba mulwadde tamutwala mu ddwaliro e Mulago.

Bbebi Ow'omwaka Ogumu N'ekitundu Eyakwasizza Muhindo

Muhindo yatumizza akadomoola k’eddagala ly’ekinnansi lye yagambye ly’akozesa okujjanjaba omwana , era n’agattako nti ye engeri gy’akola ogw’okuweereza emmere mu wooteeri emu ku nkulungo y’oku bbiri, omwana amulekera muganda we era abadde takimanyi nti amutulugunya .