Gravity Omutujju yeewadde engule y'omuyimbi asinze banne omwaka 2023

Omuyimbi Gravity Omutujju ajaguzza omwaka ogw'obuwanguzi n'ebyengera mu kisaawe ky'okuyimba, olw'oluyimba lwe olwa "Kwepicha" olukutte akati omwaka guno.

Gravity ye mwene yeetadde ku lukalala lw'abayimbi abasinze okukuba endongo omwaka guno n'agamba nti ali mu nnamba 1 talina amavuganya olw'oluyimba lwe 'Okwepicha' olufuuse ensonga mu baana, abavubuka, abakulu n'abakadde.

Mu nsengeka ze, King Saha amutadde mu kifo ekyokubiri n'oluyimba "Ebiseera Ebyo" ng'ono yakoze n 'ekivvulu ku Africana ekyakutteyo.

Fik Fameika gw'atadde mu kifo ekyokusatu n'oluyimba lwe "Bwe Paba," ate Alien Skin n'amussa mu kifo eky'okuna n'oluyimba olwa 'Party'.

Gravity omuyimbi Eddy Kenzo amutadde mu kifo eky'okutaano olw'oluyimba lwe "Balippira Boda" n'agamba nti abo abayimbi abataano nga ye ali mu nnamba emu be beetisse omwaka 2023 mu kisaawe ky'okuyimba.

Omutujju era yayongeddeko ntoi omwaka ogujja 2024 agusuubiramu okuvuganya okwamaanyi n’obumu okweyongera mu mulimu guno, n’alagula nti talanta empya zigenda kweyongera mu mwaka omupya 2024.