Ekivvulu kisaze omuyimbi Gravity Omutujju ne yeekwasa ebyuma bya Minisita Balaam

Ekivvulu kisaze omuyimbi Gravity Omutujju ne yeekwasa ebyuma bya Minisita Balaam Balugahara nti byabadde bifu.

Gravity yabadde mu kisaawe kya Cricket Oval e Lugogo gye yabadde asuubira abantu okweyiwa mu bungi abawe ‘ddoozi’, kyokka gye byaggweredde nga Cricket Oval y’emuwadde ‘ddoozi’ era yavuddeyo ng’ennyindo y’enkata.

Ebintu byalabikiddewo nga tebigenda kutambula bulungi kubanga Gravity yaluddewo okulinnya siteegi ng’alinda abantu okuwera wabula nga wa.

Gravity Ng'ali Ku Siteegi Ayimbira Abantu.

 Yamazze natandika okuyimba kyokka yabadde yaakalubayo obuyimba bubale ate n’adda mu kuyomba n’okulangira abantu ab’enjawulo okwabadde n’okunenya ebyuma nti byabadde bifu nnyo nga tebimuganya kuyimbira bantu be bulungi.

Gravity yagambye nga bwe waliwo abadongo abamwesimbamu wabula nga tebamusobola. “Nze nabagambirawo nti bwe nafuna abantu 10 bbo bajja kufuna 4.” Gravity bwe yagambye. Ebigambo ebyo byalowoozeddwa nti yabadde abiweereza Mike Wine naye eyabadde n’ekivvulu ku lunaku lwe lumu naye e Munyonyo.

Ng’ekivulu kya Gravity tekinnabaawo yatuuza olukung’aana lwa bannamawulire mwe yawerekereza Mike Wine ne ffamire ye okuli ne Bobi Wine ebigambo ng’agamba nti bonna tebamanyi kuyimba era tebamusobola nebwebegata wamu.

Gravity bwe yabadde ku kivvulu yasoose na kuyomba ku byuma bya Balaam bye yagambye nti byabadde bifu nnyo nga tebifulumya sawuundi mulungi era n’awa bayimbi banne obutabikozesa.