Wagala obwongo ne Dr Medadi Ssentanda oyige empandiika y'oluganda entuufu

Bukedde ku mukutu omutimbagano ne ku 'website' yaayo ekuleetedde akatudnu ka 'Wagala Obwongo' nga oyiga empandiika y'Oluganda entongole ne Dr. Medadi Ssetanda, omukugu mu lulimi Oluganda ku ssettendekero e Makerere.

Akapande ke twaleeta wekkaanye wiiki ewedde.

Ku mulundi ogwayita, twakulekera ekifaananyi ekyo waggulu obeeko by'olaba oba nga biwandiikiddwa mu butuufu. Ebigambo ebiri ku kipande ekyo bye bino:

OBUTUNDA

EMIYEMBE

EMICHUNGWA

OVACADO

OBUMPWACHIMPWACHI

OKUSEKULA EBINYEBWA

EBIBALA

Mu bigambo ebyo, olina ensobi yonna gye walengeramu?

Waliwo ebigambo eyawandiika by'ataatuusa bulungi. Ekigambo OBUTUNDA ne EMIYEMBE byo byatuuka.

Ekigambo EMICHUNGWA tekyatuuka.

Empandiika entuufu erina kuba EMICUNGWA.

Ekigambo ekiddako, OVACADO, nakyo kyakyama. Eyawandiika alabika nga yali aluubirira kuwandiika kya Lungereza naye ate nakyo teyakituusa.

Emirundi mingi ekigambo ekyo kizannya abantu, bangi tebakituusa mu Lungereza mu mpandiika. Eky'Olungereza kirina kuba AVOCADO. Eky'Oluganda kirina kuba OVAKEDO.

Ekigambo ekiddako, OBUMPWACHIMPWACHI, nakyo tekyatuuka bulungi. Mu Luganda eddoboozi eryo ly'owulira nga eryagala okubeeramu ‘ch' tuliwandiika na ‘C' yokka. Awo nno, ekigambo kino tulina kukiwandiika tuti: “obumpwachimpwachi”.

Ekigambo ekirala ekitatereera kye kino, EBINYEBWA. Ekigambo kino kiggumira, noolwekyo tulina kuwandiika, EBINYEEBWA. Ebirala byo biri bulungi.

Kati ka tukulekera kino kwe tuneegololera omulundi ogunaddako.

Akapande ke tugenda okulaba wiiki ejja.