Kaggo alabudde abattakisi ku ky'okwetundako ettaka: 'Muddeeyo mu byalo mulime emmwaanyi'

OMWAMI wa Kabaka ow’essaza ly'e Kyadondo Kaggo Hajji Ssaalongo Ahamed Matovu Magandazi alabudde abattakisi mu Kampala ku muze gw’okwetundako ettaka.

Bino yabyogeredde ku mukolo ogw’okutuuza n’okulayiza omwami wa Kabaka ow’omuluka gw'amasekkati - ppaaka, Muhammad Kawooya n’olukiiko lwe nga guno gutwala abattakisi okuva mu Ppaaka empya, Enkadde ne Ppaaka Yaadi.

Hajji Magandazi yakubirizza abalondeddwa okubeera eky'okulabirako ekirungi eri be bakulembera era n'abakuutira okudda mu byalo balime emmwaanyi basobole okufuna ensimbi ez’okubayamba mu bukadde bwabwe.

Abattakisi nga bakulembeddwa Rashid Ssekindi ssentebe w'ekibiina ekibagatta mu ggwanga, ekya UTOF, yasiimye Kabaka olw'okubalengera n'agamba nti kino kyongedde okubayunga ku Bwakabaka.

Omwami w'eggombolola ya Mituba IV, Henry Kawuma Male yeebazizza aba UTOF olw'okuwagira Obwakabaka era n'abasaba okwongera okunyweza obumu n'okukuuma omulimu gwa ttakisi.

Yabajjukiza okunnyikiza emiramwa gya Kabaka okuli ogw'okukuuma ettaka, okulima emmwanyi, obukozi n'okwekuuma obulwadde bwa mukenenya.

Abaalondeddwa oluvannyuma baakubye ebirayiro mu maaso ga Kaggo ne bawera okutuukiriza obuvunaanyizibwa obwabakwasiddwa mu bwesimbu.