USPA etikkidde bannabyamizannyo ne bagisibirira entanda

BANNABYAMIZANNYO ab’enjawulo baavudde ku kijjulo kya Nile Special USPA Awards nga balina ku kaseko mu mataka omubaka Asuman Basalirwa bwe yategeezezza nti Palamenti yalagidde minisitule y’ebyensimbi okussa ssente zonna obuwumbi 48 ze baayisa mu bajeti y’omwaka guno ku akawunti ya NCS omulundi gumu ku ntandikwa y’omwaka.

Basalirwa akikiikirira Munisipaali y’e Bugiri mu Palamenti yabadde akiikiridde Sipiika Annet Annita Among eyabadde alina okuba omugenyi omukulu ku mukolo guno. Basalirwa yagambye nti okussa ssente zonna ku akawunti ya NCS  kijja kumalawo ekizibu kya ttimu ezeetaaga okutendekebwa okukiikirira eggwanga nga teziriiwo olw’okuba nti ssente ziweerezebwa mu buli ‘quarter’ (emyezi esatu).

Basalirwa (ku ddyo) ne Lubega.

Entujjo ya USPA yabadde ku wooteeri ya Imperial Royale nga kwe baakwasirizza abazannyi b’omwaka 2021 ne 2022 ebirabo ku Lwomukaaga. Basalirwa yategeezezza nti Sipiika yasiimye bannamawulire abasaka ag’emizannyo olw’omulimu ettendo gwe bakola. Sipiika yajjukizza bannamawulire okutambulira ku bubaka bwe yabasibirira gye buvuddeko okusaka amawulire ag’amazima gokka era n’abeebaza okuba abasaale mu kutumbula emizannyo.

Abawanguzi ab’omwaka guno, Joshua Cheptegei owa 2021 ne Jacob Kiplimo owa 2022 tebaabaddewo nga baakikiriddwa pulezidenti w’ekibiina ekufuga emisinde, Dominic Otuchet.

Aba USPA nga bafuna ekyokulya.

Abantu ab’enjawulo kye baagambye;

AMBROSE TASHOBYA (SSENTEBE WA NCS); Y’omu ku baakwasizza abawanguzi ebirabo, yasabye bonna abeemizannyo okuwagira enkulaakulana eyassiddwaako omukono Pulezideni Museveni okuzimba ebisaawe eby’omulembe, wooteeri ebidiba ebiwugirwamu n’ebirala e Lugogo.

Yagambye nti ayagala nnyo okulaba nga waliwo ekikyuka ku mulembe gwe. “Twagala omuzannyi atendekerwe mu kusaawe ekiri mu kutindo, asule bulungi, asobole okuwuga n’ebirala. Polojekiti Pulezidenti yagitaddeko omukono etandike,” Tashobya bwe yategeezezza.

BRIG. FLAVIA BYEKWASO (PULEZIDENTI WA UNF); Ebbula ly’ebisaawe lye lizza emizannyo mu ggwanga emabega. Nsiima abadde pulezidenti wa UNF, Sarah Kityo Babirye (eyazziddwaako ebbali) olw’okutumbula omuzannyo gw’okubaka She Cranes n’efuuka nnamba emu mu Afrika. Ekirungi tukisiime. Twebaza Sarah Kityo olw’ebyo bye yakola okutumbula okubaka. She Cranes yalondeddwa ku ttiimu ezaasinga okukola obulungi mu 2021.

DOUGLAS KALEMA (NILE BREWERIES); Nile Breweries be bassa ensimbi mu USPA. Omuggalo gwa corona gwe gwalemesa okuteegeka emikolo gino.

MOSES MAGOGO (PULEZIDENTI WA FUFA): Gavumenti yeenyumiririza mu b’emizannyo olw’okutumbula eggwanga ebweru era nti nneetegefu okwongeramu ensimbi. Nkubiriza ebitongole nabyo okussaamu ensimbi.

FRED SEKITTO (OMU KU BAATANDIKA USPA); Ono yaweereddwa ekirabo kya munnabyamizannyo ow’ekiseera kyonna (omwaka 2022). USPA twagitandika mu 1970 okwawula emizannyo ku byobufuzi era nsaba abagiddukanya kati okugoberera ennono ya demikulasiya ow’okufugira ebisanja bibiri byokka.

ABAAWANGUDDE MU 2021:

• Abawanguzi mu mizannyo egitali gimu;
• Adrian Kasito ne Grace Auma (rugby)
• Rita Musamali ne Dinesh Nakrani (cricket)
• Ronald Rugumayo ne Irene Nakalembe (golf)
• Daisy Nakaziro ne Eric Kambale (mupiira)
• Thomas Kedi ne Joan Mukova (woodball)
• Shadir Musa (bikonde)
• Mary Nuba (kubaka)
• Kirabo Namutebi ne Tendo Mbabazi (kuwuga)
• Yassin Nasser ne Ali Katumba (mmotoka). N’abalala bangi.

ABAWANGUZI BA 2022;

• Charlotte Mudoola ne Philip Wokorach (rugby)
• Milton Karisa ne Phiona Nabbumba (mupiira)
• Joyce Nalubega ne Thomas Kedi (woodball)
• Tony Drileba ne Rose Akon (basketball)
• Job Odoi ne Sarah Makanga (darts)
• Winnie Birungi (ttena)
• Riazat Ali Shah ne Janet Mbabazi (cricket)
• Jacob Kiplimo ne Prisca Chesang (misinde)

• N’abalala