Klopp ayagala Salah akomewo bamwejjanjabire
Salah yalwalidde mu mpaka za Afrika mu Ivory Coast eggwanga lye erya Misiri bwe lyabadde ligwa amaliri 2-2 ne Ghana.
Salah
By Farouk Lubega
Journalists @New Vision
OMUTENDESI wa Liverpool, Jurgen Klopp ategeezezza nga ssita we Mohamed Salah bw’agenda okukomawo mu Bungereza ajjanjabwe abasawo baabwe.
Salah yalwalidde mu mpaka za Afrika mu Ivory Coast eggwanga lye erya Misiri bwe lyabadde ligwa amaliri 2-2 ne Ghana. Omupiira guno Salah teyagumazeeko era abasawo ba Misiri ne bategeeza nti afunye obuvune mu kinywa.
Bwe baabadde baakawangula Bournemouth ggoolo 4-0 mu Premier ku Ssande, Klopp yategeezezza nti bali mu nteekateeka zikomyawo Salah abasawo ba Liverpool bamujjanjabe.
Wabula kyategeezeddwa nti abakungu ba ttiimu ya Misiri balina essuubi nti omuzannyi ono ttiimu yaabwe kw’etambulira, akyasobola okussuuka n’azannya emipiira gya Afrika emirala.
Misiri eri mu kibinja B nga yaakubiri ku bubonero 2 nga Cape Verde ekikulembedde, erina mukaaga. Ghana eri mu kyakusatu ku kabonero 1 ng’esibaganye ne Mozambique ekoobedde.