Golola akeesezza 'General Fungu' ensambaggere
KAWANDABIGAMBO GOLOLA Moses ‘Of Uganda’ akeesezza Hamza Keeya ‘General Fungu’ ensambaggere n’akkiriza.
Golola akeesezza 'General Fungu' ensambaggere
By Fred Kisekka
Journalists @New Vision
Olulwana luno lubaddewo mu kiro ekikeesezza leero (Lwakubiri) December nga 27, 2022.
Lutojjeredde ku Akamwesi Mall e Kyebando ekisangibwa ku Gayaza Road nga lwetabiddwaako nnamungi w’omuntu.
Golola ayimiridde yakubye Hamza Keeya 'General Fungu' enguumi ezaamutagazza n’agwa mu miguwa.
Golola aluwangulidde ku bubonero 49-46, 50-45 ne 47-48. Battunkidde mu buzito bwa ‘middle’ kkiro 79 mu nnwana ya K1 Style omuli okukozesa tteke, ebikonde n’amaviivi.
Lwetabiddwaako bassereebu okuli abayimbi Pallaso, John Blaq, Catherine Kusasira, Zex Birangirangi, Judith Heard ow’emisono n’abalala.
Ku lulwana lwe lumu kubaddeko fayinolo ya liigi y’eggwanga ey’ebikonde emanyiddwa nga UBF Boxing Champions League.
Mu nnwana ezisinze okukwata akati kubaddeko olwa Isaac Zebra Ssennyange Jr awangudde Muzamir Ssemuddu ku bubonero 3-2 kyokka abawagizi balwanye nga bawakanya ebisaliddwaawo baddiifiri be balumirizza okubbira Ssenyange Jr.
Ssenyange Jr. ye mutabani w’omugenzi Zebra Ssennyange. Mu nnwana endala Ukasha Matovu akubye Owen Kibira ku bubonero 4-1. Jonathan Kyobe n’akuba Derrick Mubiru ku bubonero 5-0, Joshua Tukamuhebwa amezze Edward Kimera ku bubonero 5-0 n’endala.