Golola alese abadduyiro e Kololo ng'entuuyo bazisaza bibatu

MOSES Golola ow’ensambaggere oluvannyuma lw’okukoleeza omuliro mu bannayuganda n’abaagazisa okukola dduyiro, asabye Gavumenti ne minisitule y’ebyobulamu olunaku lwa dduyiro lutongozebwe emirundi waakiri ebiri mu mwaka ate kampeyini eno efuulibwe essomo eryetongodde mu buli ssomero.

Ono ye yabadde ambasada ng’eggwanga lyonna likung’aanye eggulo (June 18, 2023) ku kisaawe e Kololo okukuza olunaku lwa dduyiro omulundi ogwokusatu okuva 2020 wakati mu kaweefube w’okulwanyisa eddwadde ezitasiiga ne bannayuganda okubeera ffiiti.

Abantu nga bakola dduyiro

Golola yeegatiddwaako baminisita okuli; Jane Ruth Aceng Ocero (ow’ebyobulamu), Ruth Nankabirwa (ow’amasannyalaze n’obugagga obw’omuttaka) eyakiikiridde pulezidenti Yoweri Kaguta Museveni, n’abalala bangi baaweesezza omukolo ekitiibwa.

“Nga Gavumenti bw’etadde amaanyi ku kulwanyisa akawuka ka siriimu mu ggwanga, nsaba tukole kye kimu ne ku ndwadde ezitasiiga, tufuule dduyiro owa buli lunaku maka gaffe, Offiisi, na buli kifo ekisoboka, ate tukung’aane waakiri emirundi ebiri mu mwaka ffenna tusala ntuuyo. Kuno tugatteko okubunyisa enjiri y’okulwanyisa endwadde zino buli kifo awajjanjabirwa, amasomero ne kubintu gye tuwangaalira,” Golola bwe yategeezezza.

Ono yasabye Gavumenti emukwatireko atandike okutambuza kampeyini eno mu masomero, buli ssomero eribadde lyaggwaamu amaanyi mu kusomesa dduyiro bazuukuke, ebisaawe biteekebwe mu masomero n’ebibuuzo bikolebwenga.

Minisita Aceng yalaajanidde bannayuganda okwettanira okwekebeza endwadde ezitasiiga kuba ssinga zizuulibwa nga bukyali zisobola okujjanjabibwa ne ziwona era yakuutidde abakuze mu myaka, abakyala, n’abavubuka buli omu okufaayo okukola dduyiro.

Abantu nga bakola Dduyiro

Minisita Ruth Nankabirwa yakubirizza bannayuganda okwewala ebintu by’amasavu ebiyitiridde wabula bettanire emmere enng’anda, okunywa ennyo amazzi ne jjuyisi ataliimu ssukaali mungi, okulya ebibala, bafeeyo okutambuza ku bigere waakiri emirundi egiwerako mu wiiki n’ebirala.

“Gavumenti tegenda kussa mukono ku kulwanyisa endwadde ezitasiiga mu ggwanga y’ensonga lwaki olunaku lwa dduyiro lwatongozebwa waakiri omulundi gumu mu wiiki wabula tugenda kulwongeramu amaanyi n’ebirungo,” Minisita Nankabirwa bwe yategeezezza.