ALAMENTI yakuwaayo akawumbi kamu okuyambako mu kuzimba ekizimbe awagenda okutekebwa ekyuma ekiyambako okukalirira kookolo (Cancer) ekimanyiddwa nga Radiation Bunker ku ddwaliro lya St. Francis Nsambya.

Obweyamu buno bukoleddwa sipiika wa palamenti Anita Among bwabadde agenze okulambula omulimu gw’okuzimba ekizimbe kino wa wegutuuse kwosa n’okutongoza emisinde gya kkansa egimanyiddwa nga the Cancer run 2024, egyokubawo nga 24 August omwaka guno era nga ne kampuni ya Vision Group nsaale nnyo muntekateeka eno.

Sipiika Among agambye nti ensimbi z’obuyambi ezibaweebwa nga eggwanga balina okuziwaayo mu bintu nga bino n’agamba nti pulezidenti Museveni kwosa omuddumizi w’amagye Gen. Muhoozi Kainerugaba yabategeezezza ku nsonga eno era nga nabo bajja kuteek ettofaali muntekateeka eno.

Wabula agambye nti kino kigenda kuyamba nnyo abantu abatawanyizibwa kkansa abatalina webafuna bujanjabi bwatyo n’asaba abaddukkanya eddwaliro okulaba nga bategeezza abantu nti obujanjabi webuli wano mu ggwanga.

Steven Mwanje Vision Barrier (Post District Governor) munna Rotary agambye nti bavaayo okutandiika kino olw’abantu abangi abaali bafa obulwadde buno nga tebayinza kulinda gavumenti.

Kampuni ya Vision Group nga ekikiriddwa Loraine Tukairwa akulira obwatunzi ewaddeyo obukadde 70, Centenary Bank obukadde 300, Krystal Water obukadde 200.

Ekizimbe kino kisuubirwa okugulwawo mu 2026 nga batandiika emisinde gino mu 2015 era olw’ensonga nti bantu abali eyo mu 20,000 bebaali bafa obulwadde buno wabula nga kati balina ewasobola okutekebwa abalwadde abali eyo mu 3,000.