Amawulire
Ssentebe w'abasawo abatabuzi b'eddagala akalaatidde banne okugoberera etteeka lya Traditional Complementary Act 2019
SSENTEBE w'abasawo abatabuzi b'eddagala ery'ekinnansi mu ggwanga Hajj Jamir Mukwaya Lutaakome abakubirizza nti bagondere etteeka lya Traditional Complementary Act 2019 eryakakasizza obujjanjabi bwabwe.
Hajji Jamiru Mukwaya Lutaakome ng'asomesa abasawo n'awalala ng'ayogeraganya n'aba NDA mu musono e Lukay
By: Ssennabulya Baagalayina, Journalists @New Vision
Hajji Lutaakome agambye nti ebbago ly'etteeka lino limaze mu bubage emyaka 20 okutuusa Paalamenti bwe yaliyisizza ne Pulezidenti n'alikakasa n'omukono gwe.
Bino abyogeredde mu basawo abeetabye mu musono ogubategekeddwa aba National Drug Authority mu Royal Embassy Guest House e Lukaya mu Kalungu.
Abagambye nti tebakyaddayo kukolera manju ne mu bisegguusi kuba baategeddwa nti gye bali tebakyayitibwa balogo.
Lutaakome abalung'amizza ku bikolo by'eddagala nti babikwate bulungi bagenda kubigaggawaliramu balitunde n'ebweru w'eggwanga.
Abongeddeko nti kati bakolera wansi wa minisitule y'ebyobulamu okubakwatizaako mu by'ekikugu n'okuvunaana abakoze ensobi.
Bo aba NDA okubadde Dr Michael Mutyaba,Dr Brian Ssekayombya,Dr Edgar Ddungu ne Dr Muhammad Lukwago babalambize ku nkwata y'eddagala n'okulituukanya n'omutindo.
Babasabye okukkiriza batambule n'ekitongole n'okubalambula gye batabulira eddagala n'okulisaako obulambe nga bwe kiri ku ddagala n'ebinywebwa ng'amazzi.
Abasawo okuli Moses Mugabi, Norah Nakkuya n'abalala bawakanyizza etteeka okubakugira okutembeeya eddagala ng'ate babadde bakendeereza ku balwadde baabwe engendo.
Kino aba NDA babakakasizza nti eddagala ly'abamu likola bulungi na n'abantu babakungiriza naye ebya Gavumenti tebibeeramu kutebeereza.
Ye amyuka akulira eby'obujanjabi e Kalungu Musa Dhabuliwo abagumizza nti buli awabeera obujanjabi wabaawo n'amateeka agafugawo n'olwekyo batambulire mu tteeka.
Atwala Poliisi y'e Lukaya mu Kalungu ASP Viane Birungi yeeyamye nti Poliisi yetegese okubakwatizaako mu bikwekweto by'okulwanyisa abafere ababeerimbikamu abajjudde mu butale n'ebifo ebirala.