SSABASUMBA w’Eklesia y’Abadosokisi mu ggwanga Metropolitan Jeronymos Muzeeyi asomoozezza abavubuka bavudde ku Katonda

SSABASUMBA w’Eklesia y’Abadosokisi mu ggwanga Metropolitan Jeronymos Muzeeyi agambye eggwanga lino, amaka, abavubuka n'Eklesia biri mu kusomoozebwa lwakweggyako Katonda ng’okumuteeka mu bulamu bwaabwe, kyekinaleetawo enjawulo.

Muzeeyi yagambye nti abavubuka beetaaga okwekwata Katonda singa banabeera abantu ab’omugaso mu bulamu n’eggwanga lyaabwe.

Abamu ku beetabye mu lusirika

Okwogera bwati yabadde aggalawo olusirika lw’abavubuka Abasodokisi olwabadde ku Chwa II Memorial College e Namungoona ku lwa Ssande.

Twagala tulabe nga tutegeka abavubuka ab’enkya mu klesia zaffe, ne mu nsi yaffe nga mulina omulamwa. Omulamwa ogwo ye Katonda waffe, olwo lwetunabeera n’amakulu mu ggwanga. Eggwanga, amaka, obulamu bwamwe biyugayuga bwebiti lwakubulamu Kristo,” Muzeeyi bweyayogedde.

Metropolitan Muzeeyi yeebazizza abazadde abawaddeyo abaana okujja okuyigirizibwa ebikwata ku nzikkiriza yaabwe era n'alagira nti omwaka ogujja obudde bwakwongerwako olusirika lubeere lwa wiiki Bbiri.

Fr. Joseph Mutokya, omu ku bayigiriza abaana bano asabye abazadde okubaterawo embeera ebasobozesa okuteekesa mu nkola ebyo ebibasomesebwa ate n'okulaba nga tebava mu bulamu bwa Eklesia.

Ye Theodore Kkombe ng'ono y'akulira Chwa II Memorial College era atwala ebyenjigiriza mu kitundu Kya Eklesia ekya Kampala agambye nti entegeka eno erubiriddwamu okuwa abavubuka omukisa okumanya ebikwata ku Busodikisi ate baddeyo babiyigirize bannaabwe.

Omu bavubuka abeetabye mu Lusirika luno, Caroline Nassaka okuva e Lwemiyaga, Ssembabule yeebazizza Eklesia olw'okuteekawo olusirika luno.

Abavubuka abaakoze obulungi nga baanukula ebibuuzo bawereddwa ebirabo ate bonna abeetabyemu bawereddwa Satifikeeti