Poliisi ekutte abagambibwa okutigomya Kyebando, Kaleerwe ne Mulago

ABAGAMBIBWA  okutigomya  ab’e Kyebando, Kaleerwe, Mulago poliisi ebakutte abasuubuzi ne babawaako obujulizi

Julius Byanyima omu ku baakwatiddwa.

Okukwatibwa kwabwe kwaddiridde abasuubuzi  ku nkulungo y’oku kaleerwe okubalonkoma ku poliisi y’oku Kaleerwe nga babalumiriza okuteega abantu mu ttaawo ly’e Kyebando  , Kaleerwe  ng’abamu beefuula  abalonda ebyuma ebikadde emisana olwo ekiro ne bateega abantu . 

Amos Betungura akulira poliisi y’oku Kaleerwe eyakuliddemu ekikwekweto  yategeezezza nti abamu ku baakwatiddwa  baayimbuddwa abalala  bakyanoonyezebwako yasabye abatuuze buli omu okuba mbega wa munne kuba abantu bangi ababeera mu bitundu nga tebamanyikiddwa n’ebigendererwa byabwe eby’enjawulo .

Abamu ku baakwatiddwa kuliko;  Brian Musobozi, Emmanuel Bigala, Geoffrey Male, Haruna Kabogoza, Isaac Ninamugisha, Julius Byanyima, Peter Omara n’abalala ng’abamu ku bano abasuubuzi baagambye bazze bakwatibwa poliisi ez’enjawulo mu kawempe ne bayimbulwa .