Olutalo: Yisirayiri yaakakuba bbomu 11,000 ku Gaza

ENSI nneeralikirivu olwa Yisirayiri okukuba Gaza nga buli omu asirise. Wammanga gy’emirundi Yisirayiri gy’ekubye Gaza n’obungi bwa bbomu ne mizayiro mu nnaku 28 zokka okuva olutalo we lwatandika.

• Yaakakuba ku kibuga Gaza bbomu 11,000.

• Omugatte gw’obuzito bwazo zenkana ttani 18,000. Ekitegeeza nti buli bbomu esukka ttani.

• Kuliko ne bbomu emu yokka eya Steel Sting eyali ezitowa ttani 4,000. Ttani emu erimu kkiro 1,000.

Omuwendo gwa bbomu ezo, eggye lya Yisirayiri erya Israel Defense Forces (IDF) lye lyagwogedde, okusinziira ku mawulire ga ‘Ahram Online’.

Minisita w’eggwanga eryo oweebyokwerinda ,Yoav Gallant ye yakawang’amudde nga bwe baakakuba bbomu ezo okuva nga October 7, olutalo olwo lwe lwatandika nga Hamas emaze okubalumba n’ebattamu abantu 1,400 n’okuwamba abalala 220.

Wadde ekibiina ky’Amawanga Amagatte ekya United Nations (UN) kyavumiridde ekintu ekyo kye kyayise ettemu n’okulyewaaniramu, tewali yaafuddeyo mu nsi kuvunaana oba kukola kinene kitiisa Yisirayiri kwekomako.

UN egamba nti abantu abaakafa olw’eryanyi eryo bagenda mu 9,000.

Amawulire ga Anadolu Ajansı ag’e Turkey gagamba nti, ttani 18,000 ezaakakubwa Gaza zisinga obungi bwa ttani za bbomu ezaakubwa Hiroshima ne Nakasaki mu Japan mu 1945.

Omwaka ogwo America yakuba bbomu za nukiriya bbiri ku bibuga ebyo ezatta abantu abali mu nkumi n’enkumi.

EBIRALA EBYONOONEDDWA BBOMU 11,000

Okusinziira ku Salama Marouf, akulira eby’emirimu mu Gavumenti ya Hamas mu Gaza, Yisirayiri esaanyizzaawo ebizimbe bya Gavumenti yaabwe 85, emizikiti 47 n’okwonoona ekkanisa ssatu.

Yaakayonoona amaka 200,000 nga ku ago amaka 32,500 gaasaanirawo ddala.

• Ebirala ebyonooneddwa kuliko amasomero 203.

• Amasomero 45; Yisirayiri erudde ng’egamba nti tegenderera kukuba masomero na masinzizo kyokka abakambwe ba Hamas babyekwekamu ekibawaliriza okubakubiramu.

• Bannamawulire 35 balufiiriddemu

• Abasawo 124

• Abeebyokwerinda abayamba abantu okubaggya mu buzibu nga bw’olaba aba Red Cross, 18.

Bawaddeyo ku lw’embaga ya Kyabazinga

EBIKOLEDDWA OKUTANGIRA YISIRAYIRI

Tewali ky’amaanyi okuggyako America okusaba Misiri ne Yisirayiri okukkiriza ababundabunda okuva e Gaza bagende e Misiri era kyakkiriziddwa.

Pulezidenti wa UAE, Sheikh Mohammed bin Zayed ye yalangiridde okutaasa abaana 1,000 abaddusiddwa mu Gaza.

Pulezidenti wa Misiri, Abdel-Fattah El-Sisi yasabye Katikkiro wa Bungereza Rishi Sunak okusaba banne naddala Joe Biden owa America bakake Yisirayiri esiriikirize mu kulwana kyokka bonna ebyo tebabiriiko.