Olusiisira ly'ebyobulamu e Gayaza lujunye abawejjere
OBUSAABADINKONI bw'e Gayaza nga buli wamu n'ekitongole ky'eby'obulamu mu Bulabirizi bw'e Namirembe bategese olusiisira lw'eby'obulamu mwe bajjanjabidde abatuuze endwadde ez'enjawulo.
Olusiisira ly'ebyobulamu e Gayaza lujunye abawejjere
By Bukedde Omusunsuzi
Journalists @NewVision
OBUSAABADINKONI bw'e Gayaza nga buli wamu n'ekitongole ky'eby'obulamu mu Bulabirizi bw'e Namirembe bategese olusiisira lw'eby'obulamu mwe bajjanjabidde abatuuze endwadde ez'enjawulo.
Olusiisira lubumbujjidde ku Kkanisa y'Omutukuvu Stephen e Kasozi mu Busumba bw'e Namulonge mu Busaabadinkoni bw'e Gayaza, mu bujjanjabi obwakoleddwa ab'eddwaaliro lya St. Stephen e Mpererwe ku bwereere.
Ssabadinkoni Ven Mwanje Ng'akwasa Abawereddwa Engoye.(moses Nyanzi)
Bajjanjabye abatuuze abasobye mu 200 endwadde ez'enjawulo abakadde abalina Puleesa, Sukaali, n'ababadde n'endwadde endala ez'enjawulo ezisookerwako oluvannyuma lw'okukeberebwa nga baggyiddwaako omusaayi ne baweebwa eddagala okusinziira ku kirwadde ekibadde kimutawaanya. Kuno kugatiddwaako n'okubasabira.
Ssaabadinkoni Ven. Mwanje agamba nti afunye okusomoozebwa mu kulambula amakanisa ng'ajja atunuulira embeera abantu gye bayitamu nga balwadde abeetaaga okujjanjabwa naye ng'obusobozi obugenda mu malwaliro nga Mulago nga tebuliiwo, kwe kusalawo obujjanjabi nga buno waakiri obusookerwako bubatuusibweko.
Omwami Ng'ayamba Ku Mukadde Eyaze Okujjanjabwa.(moses Nyanzi)
Yagasseeko nga enteekateeka eno yaakugenda mu maaso mu Busaabadinkoni buno okubwetoloola okulaba ng'ababuulirwa enjiri Baba balamu obutabajuza njiri yokka ng'obulamu bubatawaanya nga kino kye kimu ku kweyama kwe yakoze ng'atuuzibwa ku bwassabadinkoni.
Mu nteekateeka eno bagigasseeko okuwaayo engoye ezikozeeko ezakungaanyiziddwa okuva mubakulisitaayo eri abo abetaavu nga bayita mu kitongole Kya Good Samaritan.