Aba UPDF 13 bakwatiddwa okulumba poliisi ne bakuba DPC

ABAJAASI ba UPDF 13 abakolera mu kakiiko ka Pulezidenti akalwanyisa emivuyo ku ttaka n’okukuuma obutonde bw’ensi akaduumirwa Brig. Gen. Moses Lukyamuzi, abaatwalidde amateeka mu ngalo ne balumba poliisi y’e Wakiso ne bateeka omuduumizi waayo ku mudumu gw’emmundu bakwatiddwa.

Okusinziira ku kiwandiiko ekyafulumiziddwa Poliisi, abajaasi bano baabadde batambulira mu mmotoka bbiri okuli Toyota Hiace eyakazibwako erya Drone, nnamba UBG 041U ne Toyota Noah nnamba UBR 647B.

Bwe baatuuse ku Poliisi y’e Wakiso, baatadde agiduumira, DPC Esther Kiiza ku mudumu gw’emmundu, ne bamulagira okwambulamu yunifoomu ye, oluvannyuma lw’okugaana okuteeka mu nkola ekiragiro kyabwe eky’okubayambako okusengula abantu abamu ku ttaka erikaayanirwa.

Poliisi mu kiwandiiko kyayo egamba nti omuserikale waayo Kiiza yagaanyi okuwuliriza abajaasi bano, kubanga kye baabadde bamulagira okukola kyabadde kimenya mateeka era baabadde tebazze na kiragiro kya kkooti, wadde okwebuuza ku kakiiko k’ebyokwerinda n’obutebenkevu mu disitulikiti.

Kino kyanyiizizza abajaasi ne bamwambalira era abaserikale ba poliisi abaabaddewo ne bagamba nti tebajja kukkiriza jjoogo lifaananako bwe liti, kwe kusumulula emmundu ne wabaawo okuwaanyisiganya amasasi, gye byaggweeredde ng’abajaasi badduse.

Amangu ago Poliisi okuva mu kitundu kya Kampala Metropolitan North, yakwataganye n’amagye okuva ku bbaalakisi y’e Kakiri, ne balondoola abajaasi bano era baabakwatidde ku Yesu Amala e Nansana mu disitulikiti y’e Wakiso
nga kati balinze kuvunaanibwa.

Bino we bibeereddewo nga waakayita omwezi gumu gwokka, ng’abajaasi ba UPDF abaali abakambwe ng’ennumba balumbye poliisi y’e Lubowa ku luguudo lw’e Ntebe ne bakubaakuba abaserikale abaasangibwawo kwossa abantu ba bulijjo, ng’entabwe yava ku poliisi kugaana kuggalira abantu abaali baleeteddwa abajaasi bano, kubanga baalemwa okunnyonnyola gye baali babaggye n’emisango gye baali bazzizza.