Olukiiko olufuga ettaka mu Kampala lulayiziddwa Lukwago n'alabula

OLUKIIKO olupya olufuga ettaka mu Kampala lulayiziddwa Loodi Mmeeya Erias Lukwago n’alabula abalondeddwa nti tebageza ne bakwata ku ttaka ly’amasomero ga Gavumenti oba amalwaliro.

Yabalagidde nti bayambeko nnyo ku bantu abalina emivuyo gy’ettaka lya liizi okubalwanirira n’ategeeza nti ekibuga kiteekwa okufuna ku buweerero ng’abantu bali bulungi n’ebyobugagga byaabwe.

Olukiiko olulayidde lukulirwa munnamateeka Joseph Anguria, nga lutuulako Ruth Kijjambu, Muky. Josephine Muwonge, muganda wa Hassan Basajjabalaba ayitibwa Hajji  Erias Ntale, Hussein Kato , Haruna Ssebaggala ne Jimex  Mujuni.

Omulamuzi wa kkooti etuula ku KCCA, Edger Kakaire ye yalulayizza eggulo ku City Hall .

Ssentebe w’olukiiko era munnamateeka  Joseph Anguria ye yasoose okukuba ebirayiro n'ategeeza nti baasomye amateeka agafuga ettaka mu ggwanga ne bageetegereza era bagenda kwewala ebizze bisuula ababaddewo mu butego.