Namyalo abasabye okulonda abanaabalumirirwa

AKULIRA ofiisi ya ssentebe wa NRM mu ggwanga, Hajati Hadija Namyalo asabye Banna–NRM abayitamu okukiikirira abasuubuzi ku bukiiko bw’ekibiina kyabwe
okwetooloola Uganda okubeera eky’okulabirako mu byobusuubuzi eri bantu ababalonda.
“Nsaba mwenna bannakibiina kya NRM okwetooloola eggwanga okuteeka eriiso ejjogi ku muntu gwe mugenda okwesiga okuwa obuvunaanyizibwa okubakiikirira ku lukiiko olufuzi olw’oku ntiiko mu kibiina kyaffe (CEC) okubeera ng’alina omutima ogugenda okubalumirirwa nammwe musobole okweggya mu bwavu kuba kiswaza okubeera ng’oli mukulembeze w’abasuubuzi eyo mu kitundu gy’okiikirira kyokka nga ggwe
asinga okubeera omwavu.
“Nze mu kiseera kino sirina avuganya yenna gwe ng’amba nti gwe mpagira ku beesimbyewo mu bifo eby’enjawulo mu CEC okuggyako ssentebe waffe Y. K Museveni
okutuusa nga mmaze okwetegereza buli manifesito ya buli muntu ne ndyoka mbeerako gwe nsimba mu mugongo ” Namyalo bwe yategeezezza.
Namyalo bino yabyogeredde mu lukung’aana aba NRM abaayitamu okukiikirira abasuubuzi okuva  mu bitundu bya Buganda olwa ‘NRM Entrepreneur League”
abaakung’aanidde ku Maya Natural Resort, eky’omumyuka wa ssentebe wa NRM Al – Hajji Moses Kigongo ku luguudo lw’e Masaka ku Lwomukaaga. Bano baabadde ku mukolo gw’okutongoza SACCO yaabwe eyitibwa Uganda NRM Entrepreneurs
League Members Savings & Credit Cooperation Society Ltd ogwategekeddwa omuwabuzi wa Pulezidenti ku by’obusuubuzi, Philp Kakuru akolera mu South
Africa. Namyalo yagambye nti ye ensonga lwaki amaanyi ge agamalira ku mukama we Pulezidenti Museveni  yekka gw’anoonyeza akalulu kubanga y’alina Bannayuganda
bonna bye beetaaga bye yasuubiza okubakolera era n’asaba bamulabire ddala mu kalulu ka 2026.
Mu lukiiko olufuzi olwa CEC, njagala mulonde omuntu agenda okubasakira era n’asaba abalonzi abalina akalulu k’abasuubuzi okufaayo ennyo okwetegereza
ku beesimbye ku kifo kino ekya ssentebe w’abasuubuuzi mu CEC, okuli Phillip Kakuru, Hajji Hassan Basajjabalaba, Sanjay Tanna ne Dr. Robert Mwesigwa Rukaali
abaddeyo.
Phillip Kakuru ku myaka 44, yagambye nti okwesimbawo ku kya ssentebe w’abasuubuzi bonna mu kibiina kya NRM, ayagala ulaga enjawulo ssentebe w’abasuubuzi bw’alina okweyisa. Mu myaka 20 egiyise, abantu ababadde bakiikirira abasuubuzi ku kifo
kino balemeddwa okubateerawo SACCO omukulembeze mwe yandisobodde okubateera ensimbi z’entandikwa. Sacco eno wadde yatandise ggulo naye yafunye bammemba
162, okuva mu Buganda gattako 50, abaasooka emyezi ebiri nga tugiwandiisa