Museveni akyatalaaga Ankole : Akooneddemu ab'e Mitooma ku nkulaakulana

PULEZIDENTI Museveni yeesozze ebitundu by'e Rwenzori okunoonya akalulu nga atandikidde mu disitulikiti y'e Kasese ne Bunyangabu olunaku olwaleero .

Eggulo ku Lwokusatu Gen. Museveni lwe yafundikidde okunoonya akalulu mu bitundu by'e Ankole nga yakomekkereza mu disitulikiti y'e Mitooma ne Rubirizi .

E Mitooma yasuubizza abaayo nti waakuteekawo ensako y'ebijimusa mu kisanja ekiggya nga mu nsako eno abalimi naddala abo abalima mu bungi bajja kuba basobola okuweebwa ssente ez'okugula ebijimusa biyambeko mu nnimiro zaabwe.

Yabawadde amagezi buli omu alime ky'ayagala kasita abeera nga asoose kukola kibalo nti ky'alimye kye kinaavaamu ssente, bw'atyo yategeezeza nti obulimi naddala obw'emmwanyi buwadde bannansi obugagga.

Yakalaatidde abantu okwongera okwettanira enteekateeka za gavumenti ezenjawulo ez'okwekulaakulanya n'okugoba obwavu gamba nga PDM, Emyooga n'endala nnyingi, n'akinogaanya nti obwavu mu maka busaanidde bufuuke lufumo era buli omu asaanide yeerwaneko.

Yalaze essanyu nti enkulaakulana etojjera e Mitooma okuli amasannyalaze agasasaanide ebitundu eby'omu byalo, amasomero ga Gavumenti nago gakola era mu kisanja ekiggya waakufuba okulaba nga teri ssomero lya Gavumenti lyonna liddamu kukozesa lukujjukujju kuggya ku bayizi fiizi kuba bateekeddwa kusomera bwereere ewatali kusasula yadde ennusu .

Yamenyemenye enguudo ezikoledwa mu disitulikiti eno n'asuubiza nti n'oluguudo olwa Bwizi - Kabwohe - Kitagatta lwakuyungibwa ku disitulikitti y'e Mitooma.

Ye Janet Museveni yeebazizza Katonda olw'okulung'amya Gen. Museveni ku nfuga y'eggwanga ennungi esobozeseza emirembe okubukaala mu buli kanyomero k'eggwanga.

Yakunze abavubuka okwettanira emirembe n'obutebenkevu ebiri mu ggwanga nga eky'ebbeeyi okwewala ebikolwa eby'obutabanguko byonna .

Minista Kahinda Otafiire naye yakkaatirizza eky'emirembe egiri mu ggwanga n'akuutira buli omu okugikwata nga ekyatika .