Muntu alaze ab'e Busoga bye bateekwa okukola okweggya mu bwavu n'okukyusa embeera zaabwe.

RT.Major.Gen.Mugisha Muntu awabudde abantu mu bitundu by'e Busoga ku bye bateekwa okukola okweggya mu bwavu n'okukyusa embeera zaabwe.

Kino kiddiridde abantu mu disitulikiti okwabadde Mayuge ne Iganga Muntu bw'abadde agenzeeyo okusaggula akalulu okumulaajanira ku mbeera y'obwavu mwe bawangaalira wadde nga bantu balimi.

Muntu bw'abadde ayogerako eri abantu b'e Mayuge ne Iganga abawadde amagezi okussa essira ku nsonga y'abakulembeze be balonda n'ategeeza nti nga Busoga balima ebirime eby'enjawulo omuli; ebikajjo,omukyere n'ebirala by’agambye nti ssinga wabaawo obukulembeze obufaayo ku nkulaakulakulana y'abantu kibeera kyangu okuteerawo abantu embeera ebayamba okweggya mu bwavu.

Wano Muntu agambye nti bw'afuuka Pulezidenti waakuteekawo ensawo ewola abalimi ensimbi ku magoba amatono okulabanga bagula ebikozesebwa byonna ne basobola okulima ebintu ebiri ku mutindo kibasobozese okufunamu ssente ezeegasa.

Mu ngeri y'emu abantu b'e Mayuge era balaajanidde Muntu ku magye agassibwa ku nnyanja nga bagamba nti gababuzizzaako embiibya ne bamusaba nti bwe bamulonda abibakolereko n'abasuubiza nti bwe bamulonda amagye si gaakudda ku nnyanja.

Abalala balaajanidde Muntu ku kibbattaka ekisitudde enkundi mu Busoga nga bagamba nti baagobaganyizibwa ku ttaka lyabwe ne bamusaba abataase era n'asuubiza nti mu gavumenti ye buli Munnayuganda waakufuna eddembe lye.

Bo aba bodaboda e Iganga bamulaajanidde ku kkampuni ezibawola pikipiki nga bagamba nti nakyo kibakosezza nnyo n'ategeeza nti mu gavumenti ye si waakukkiriza kkampuni ezo kunyunyuta Bannayuganda.