Kkooti yagobye bannamawulire mu gw'okulebula Pr Kayanja
KKOOTI e Mengo ekalambidde obutakyusa bye yasooka okusalawo ku by'okugaana bannamawulire okukwata obutambi bw'amaloboozi n'ebifaananyi ng'omusango gw'okulebula omusumba wa Miracle Center Cathedral e Lubaga Pr. Kayanja guwozesebwa
Kkooti yagobye bannamawulire mu gw'okulebula Pr Kayanja
By Ssuuna Peter
Journalists @New Vision
KKOOTI e Mengo ekalambidde obutakyusa bye yasooka okusalawo ku by'okugaana bannamawulire okukwata obutambi bw'amaloboozi n'ebifaananyi ng'omusango gw'okulebula omusumba wa Miracle Center Cathedral e Lubaga Pr. Kayanja guwozesebwa.
Omulamuzi Adams Byarugaba owa kkooti ya Nateete Lubaga e Mengo bwe yabadde awa ensala eno, yategeezezza nti tasobola kwetama ngalike ku bye yasalawo edda kubanga kkooti ye terina buyinza bukola kino okuggyako kkooti enkulu.
Mu nsala eyasooka yategeeza nti bannamawulire baakugobereranga ebigenda mu maaso nga bawandiika, okuwuliriza mpozzi n'okwetegereza n'awera okukwata obutambi bwonna.
Yazzeemu okukikkaatiriza obutakikola mpozzi n'akolamu ennongosereza katono okubadde okukwata omulamuzi ng'ayingira, ng'awa ensala ez'enjawulo era n'awera okukwata obutambi g'omuntu oyo tamuwadde lukusa.
Kyaddiridde gye buvuddeko Omuwaabi wa Gavumenti Jonathan Muwaganya okwemulugunyiza kkooti nti wabaluseewo abantu okwetoloola ensi yonna abatandise okukubaganya ebirowoozo ku musango ogukyali mu kkooti nga n’abamu batandise okuguwaako enkubira ekintu ekimenya amateeka.
Kino kyasiikuula emmeeme y’abawawaabira era balooya baabwe nga bakulembeddwamu Bernard Mugyenyi baateekamu okusaba nga baagala kkooti ekigaane nga bagamba nti balaba oludda oluwaabi lwo lunaatera okukomekkera obujulizi bw'alwo olwo ne bawera Kamera mu kkooti.
Baategeeza nti si kya bwenkanya mu kiseera nabo lwe batuuse okwewozaako ate bino okuyisibwa, baakubira nga baagala bannamawulire okusigala nga bakwata ebigenda mu maaso bo kye bagamba nti bwe bwenkanya.
Kino tekyasobose era kkooti omusango n'egwongezaayo okutuusa nga June 28, 2024 guddemu okuwulirwa.
Abawawabirwa mwenda Moses Ssemanobe, Alex Wakamala, Martins Kagolo, Aggrey Kanene, Peter Sserugo, Reagan Ssentongo, Labeeb Kalifah, Israel Wasswa ne Jamir Mwada kigambibwa beekobaana ne balumba kkanisa ya Kayanja nga September 17, 2021 ne bamwogerako kalebule nti yabatusaako ebikolwa by’ekikukujju ne bakwatibwa kati gwe bawerennemba nagwo.