Kkanisa ya Victory Christian Church yasimattuse okukwata omuliro

ABASUUBUZI b’embaawo n’ebibajje mu Ndeeba basobeddwa olw’omuliro ogwakutte ne gusaanyaawo emmaali yaabwe ya buwumbi bwa ssente.
Ekkanisa ya Victoria Christian eriraanye ekifo ekyakutte omuliro nayo yayiddeko ekitundu ky’emmanju n’ettanka z’amazzi ze baawanika waggulu ne zikwata omuliro.
Abasuubuzi abalala abaakoseddwa kuliko abalinawo ebyuma ebiranda embaawo n’okuziyuza ebyasaanyeewo gattako abalina obuyumba mwe batundira ebyokulya nabo abaasigadde mu maziga olw’ebintu byabwe okusaanaawo.
Omuliro gwatandise ng’obudde bukya mu kiro ekyakeesezza Olwokutaano mu Zzooni ya Tomusange mu Ndeeba ne gugenda nga gulanda era poliisi yalwanye nagwo okumala essaawa nga ssatu okugizikiza. Obwedda buli poliisi gy’eva ng’omuliro guddamu okwaka olw’embaawo n’ebisusunku ebyabadde ebingi nga byaka ng’ebiyiwemu amafuta.
Ssentebe w’abasuubuzi b’embaawo mu kitundu kino, Alex Ssekasamba yagambye nti bwe babalirira ebintu ebyayidde biyinza okusuka mu kawumbi kalamba. Abakuumi mu kifo kino baalabye amasannyalaze nga gabwatuka ekyaddiridde kwe kubwatuka kw’ekintu ekyamaanyi ekyawanuddeyo ttulansifooma n’egwa awo omuliro ne gutandika okutuntumuka.
Night Bukenya atunda embaawo ng’alina n’ebyuma bibiri yagambye nti kitaabwe ye yatandika bizinensi kyokka kati bakomye kubanga buli kimu kiweddewo.
Joan Nalugga abadde atunda ebyokulya n’okunywa yagambye nti ssente ze babadde bakozesa baazeewola kyokka bizinensi yasaanyeewo tewali kintu kyonna kye baataasizza. Omubaka w’ekitundu Aloysius Mukasa yategeezezza nti guno si gwe mulundi ogusoose ng’ebibanda bikwata omuliro nga waakutuusa eddoboozi lyabwe mu ofiisi ya Katikkiro wa Uganda.
Luke Oweyesigyire, amyuka omwogezi wa poliisi mu Kampala n’emiriraano yategeezezza nti banoonyereza ekyavuddeko omuliro