Kitalo! Ababbi basazeeko obulago omuwala gwe basabye essimu n'agigaanira
Abatuuze ababadde abakambwe nabo , bakutteko omu ku babbi ne bamukuba emiggo egimuttiddewo oluvannyuma lw'okumusanga n'essimu y'omugenzi gy'abadde abbye.
Kitalo! Ababbi basazeeko obulago omuwala gwe basabye essimu n'agigaanira
By Godfrey Kigobero
Journalists @New Vision
OMUWALA abadde agaanidde essimu, ababbi bamusaze obulago ne bamutta wakati mu kulaajana.
Abatuuze ababadde abakambwe nabo , bakutteko omu ku babbi ne bamukuba emiggo egimuttiddewo oluvannyuma lw'okumusanga n'essimu y'omugenzi gy'abadde abbye.
Ettemu lino, libadde Busajjabwankuba Cell mu Namunsi Ward mu Northern Division e Mbale , ababbi babiri ababadde n'ekiso, bwe bateeze Jane Nambuya 18 abadde ava okugula amanda ekiro, ne bamusala obulago ne bamutta wakati mu kugaanira n'okulwanira essimu ye.
Kigambibwa nti wabaddewo omu ku batuuze, abalabye era n'akunga banne ne babagoberera, kwe kunywezaako omu ategeerekeseeko erya Muhamad 17 owa Doko cell e Mbale, era kigambibwa nti mu mu kumwaza, bazudde essimu y’omugenzi n’ekiso ekibadde kijonjobanye omusaayi, ne bamukuba ne bamuttirawo.
Omwogezi wa poliisi e Mbale, Rogers Taitika, ategeezezza nti emirambo gyombi, gitwaliddwa mu ggwanika e Mbale okwegyekebejja, ng'okunoonyereza n'okuyigga omulala, kukolebwa.