Gavumenti yakweyambisa bannaddiini mu bya ssente z'emiruka

MINISITA w'amasannyalaze n'ebyobugagga obw'omuttaka Ruth Nankabirwa ategeezezza nti gavumenti yakweyambisa abakulembeze b'amadiini babayambeko okuteeka munkola okugaba ssente z'okumiruka (Parish Development Model) ezigenderedde okusitula embeera z'abantu.
Nankabirwa okwogera bino yabadde yeetabye ku mukolo gwa Ssaabalabirizi w'ekkanisa ya Uganda-Archbishop Rev. Dr. Stephen Samuel Kaziimba Mugalu, bwe yabadde yeebaza Katonda olw'okuweza emyaka 60 egy'obukulu.

Ssaabalabirizi Stephen Kaziimba ne mikwanogye abeetabye ku kabaga

Omukolo gwabadde Namirembe mu maka ga Ssaabalabirizi.
Omulabirizi w'e Namirembe Bishop Wilberforce Kityo Luwalira, yoomu ku beetabye ku kabaga kano era n'alaga obukulu obuli mu kukuza amazaalibwa omuli okwefumintiriza Katonda gy'aba akujje ne w'abakutuusizza.
Margaret Kaziimba wamu n'abaana baabwe abaakulembeddwamu Capt. Enock Kaziimba baatenderezza Katonda olw'okukuuma kitaabwe n'okumulinnyisa amadaala n'atuuka n'okutuula n'Abalangira omuntu eyali talina kyalina.

Ssaabalabirizi Stephen Kaziimba Mugalu ne mikwanogye nga basala keeki

Mukwogerakwe, Archbishop Kaziimba obuwanguzibwe yabwesigamizza ku kulokoka era n'asaba buli muntu okwewaayo eri Katonda olwo buli kimu kitereere.
Kaziimba era yeebazizza mikwanogye olw'okuwoma omutwe munteekateeka y'akabaga k'amazaalibwa ge abaakulembeddwamu Emmanuel Katongole (akulira kampuni ya Quality Chemicals), omumyukawe Rt. Rev. Dr. Hannington Mutebi, Provost wa All Saints Nakasero-Rev. Dr. Rebecca Nyagenye, Provost wa Namirembe Cathedral-Rev. Canon Jonathan Kisawuzi Ssaalongo, n'abalala