Gavumenti ereeta misomo gya AI mu masomero

Ensangi zino, ekigambo ‘AI’ tekiva ku mimwa gy’abantu. Ku mikutu gimugattabantu; ebifaananyi ne videyo ezimu ogenda okulaba ng’abalabi bagamba nti za AI. Kino no kiraga engeri AI gy’esensedde obulamu bwaffe okutwaliza awamu. 
Ne gavumenti eteekateeka kuleeta misomo gya ttekinologiya egya AI (Artificial Intelligence) mu masomero. Bagenda kuteekawo ‘curriculum’ nnamba okusobola okuyamba abayizi bonna okuli n’abaliko obulemu okugiganyulwamu.
Dr Fredrick Edward Kitoogo, akulira Uganda Institute of ICT (UICT) agamba nti emisomo gino gigenda kuyamba abayizi okukozesa AI okuyiiya ebintu ebyenjawulo ebyoleka obuwangwa n’ennono. Era bajja kusobola okutondawo emirimu, batumbule obulimi, eby’obujjanjabi, bizinensi n’ebyenjigiriza. 
Abasomesa nabo bajjakufunamu kubanga bagenda kukozesa ebyuma ebyomulembe okusomesa, kibawewuleko ku mirimu.
Kitoogo agamba gavumenti era egenda kuteekawo ebifo bya AI (hubs) mu bitundu ebyenjawulo okwetooloola eggwanga mu ngeri y’okubunyisa ttekinologiya mu ggwanga. 

Dr Fredrick Edward Kitoogo Principle Uganda Insitute of ICT

Bino Kitoogo yabyogeredde ku Makerere University Business School (MUBS) bwe yabadde omugenyi omukulu ku lukungaana lw’abaliko obulemu oluyitibwa ‘Annual Disability Lecture 2025’ ogubeerawo buli mwaka. Lwabadde wansi w’omulamwa; "AI for Tomorrow: Empowering students for the future workforce" ekivvuunulwa; AI enkya. Okutumbula abayizi okubeera abakozi b’enkya.
Gorretti Byomire, akulira MUBS Disability Resource and Learning Centre, yagambye nti  mu bbanga ttono mu maaso,  omuntu yenna eyeebalama AI ajjakuzibuwalirwa okufuna omulimu. Yasabye abayizi naddala abaliko obulemu okuteekebwa ku mwanjo mu misomo gya AI, kibasobozese okwanguyirwa obulamu.
Ye omuyuka w’akulira yunivaasite ya MUBS, Associate Professor Racheal Mindra yagambye nti ne yunivaasite zigenda kuganyulwa mu misomo gya AI era abamu abali mu masomo aga waggulu baatandika dda okusoma. N’amasomero ga Pulayimale gaakuganyulwa.
Olukungaana lwetabyemu abayizi bangi okuli n’abaliko obulemu, abasomesa, abakozi ba gavumenti n’abakugu mu bya ttekinologiya