Ekyabadde mu kusabira Kkwiini ku lutikko e Namirembe
BANNABYABUFUZI ne bannaddiini batenderezza omukululo abadde Kkwiini wa Bungereza Elizabeth II, gw’aleese mu kutumbula obukulembeze mu nsi yonna.“Si kyangu kufuna ebigambo ebituufu by’oyinza okukozesa ng’oyogera ku Kkwiini Elizabeth II, naddala ng’osaasira ffamire ye, eggwanga lya Bungereza n’ensi eziri mu mukaago gwa Commonwealth ne Uganda mw’eri mmemba olw’engeri Nnaabakyala ono gy’abadde abakulemberamu etagenda kwerabirwa”, minisita w’ensonga z’amawanga ageebweru Gen. Jeje Odongo bwe yategeezezza.
Abakungu abeetabye mu kukungubagira Kkwiini wa Bungereza e Namirembe abakulembeddwa omubaka wa Bungereza mu Uganda Kate Airey (wakati), Amama Mbabazi n’abalala okuli ne Bp. Wilberforce Kityo Luwalira.
BANNABYABUFUZI ne bannaddiini batenderezza omukululo abadde Kkwiini wa Bungereza Elizabeth II, gw’aleese mu kutumbula obukulembeze mu nsi yonna.
“Si kyangu kufuna ebigambo ebituufu by’oyinza okukozesa ng’oyogera ku Kkwiini Elizabeth II, naddala ng’osaasira ffamire ye, eggwanga lya Bungereza n’ensi eziri mu mukaago gwa Commonwealth ne Uganda mw’eri mmemba olw’engeri Nnaabakyala ono gy’abadde abakulemberamu etagenda kwerabirwa”, minisita w’ensonga z’amawanga ageebweru Gen. Jeje Odongo bwe yategeezezza.
Bino Gen. Jeje Odongo abyogeredde mu kusabira Kkwiini, okwategekeddwa mu Lutikko y’Omutukuvu eya St. Paul e Namirembe ku Lwokuna nga kwetabyeko; abakungu okuva mu Gavumenti n’ab’e kitebe kya Bungereza mu Uganda.
Kwabaddeko n’abakungu okuva e Mmengo abaakulembeddwa Sipiika Luwaga Mugumbule eyakiikiridde Katikkiro wa Buganda, Loodi Mmeeya wa Kampala Erias Lukwago, Kaliisoliiso Beti Kamya, ssentebe wa St. John’s Ambulance mu Uganda omulamuzi Geoffrey Kiryabwire, Maj. Gen. Mugisha Muntu n’abalala.
Okusaba kuno kwakulembeddwamu Omulabirizi w’e Namirembe Bp. Wilberforce Kityo Luwalira ng’ayambibwako ddiini wa Lutikko Rev. Con. Ssaalongo Jonathan Kisawuzi n’abalala.
Gen. Odongo yagambye nti ebintu bingi abyabbulwa mu Kkwiini ono mu Uganda emirundi ebiri gye yaggya muno era bino mukululo gw’amaanyi ogugenda okusigala nga Bannayuganda bamujjukira .
Omulabirizi Luwalira yagambye nti, omuntu bw’abeera omulamu buli lw’aweza omwaka omulala tujaguza amazaalibwa ge ne tubaala n’emyaka gy’awezezza n’okumwagaliza ebirungi mu bulamu wabula bw’afa, tubeera twebaza Katonda olw’ebirungi by’amukozesezza.
Yayongeddeko nti, tetwogera kibi kyonna ku muntu afudde ebyo tubirekera Katonda.
Ambasada wa Bungereza mu Uganda Kate Airey (OBE), yagambye nti, “amawulire g’okufa kwa Kkwiini Elizabeth II, gawawaaza ensi yonna era tusabira ffamire ye, Abangereza gattako n’ensi 56, z’abadde atwala mu Commonwealth.”
Yasabye Katonda okugumya Kabaka waabwe King Charles III asobole okugenda mu maaso n’obuvunaanyizibwa bw’obukulembeze.