Ekyabadde e Masaka nga Bp. Jjumba ajaguza emyaka 5

OMUSUMBA Serverus Jjumba ajaguzza emyaka 5 bukya atuuzibwa ng’Omusumba w’essaza lye Masaka oluvannyuma lw’Omutukuvu Paapa okumulonda.
Emikolo egy’okujaguza gyabadde Kitovu mu kibuga Masaka nga gyatandise n’ekitambiro kya Mmisa kye yakulembedde nga kyetabiddwaamu abantu bangi okuva mu nzikiriza ez’enjawulo.
Mu kitambiro kino, Bp. Jjumba yasabye Katonda okwongera okumuwa amaanyi, obusobozi n’amagezi okuweereza n’okulambika abakkiriza mu ssaza lino lye yamukwasa emyaka etaano egiyise.
Yategeezezza nti newankubadde emyaka gino gibadde gya bibala, kyokka gibaddemu n’okusoomoozebwa okw’enjawulo ne yeebaza abantu n’ebitongole naddala ebya Klezia ebimuwaniridde n’asobola okuyita mu kusoomoozebwa okwo.
Bp. Jjumba yatuuzibwa nga July 6, 2019 ng’adda mu bigere by’omugenzi Bp. John Baptist Kaggwa.
Ssaabasumba Paul Ssemogerere mu bubaka bwe yatisse Msgr. Charles Kasibante, Vica w’essaza ekkulu ery’e Kampala, yayozaayozezza Omusumba Jjumba olw’okutuuka ku myaka egyo ng’aweereza era n’amusaba obutaggwaamu maanyi ng’afunye ekimusoomooza.
Yamutenderezza olw’obuweereza obw’ebibala bw’akoze mu ssaza lino ate ne Klezia okutwaliza awamu ekigiyambye okwongera okukula mu bulamu obw’omwoyo ne mu mubiri.
Ku mukolo guno abaseminaliyo 26 mu ssaza lino baaweereddwa omuluka ogw’obusomi n’obuweereza ate abalala ne basimbawo okwetegekera okufuna ogw’obudyankoni awamu n’obusaseredooti.
Omukolo guno gwetabiddwaako abantu bangi okwabadde eyali omumyuka wa Pulezidenti, Edward Kiwanuka Ssekandi, Minisita Haruna Kasolo, ababaka ba Palamenti ab’enjawulo, abasuubuzi n’abeebitibwa abalala