Ebya Sipiika okugaana ekiteeso kyaffe tetujja kukikkiriza – Ssekikubo ne banne bakalambidde!!

ABABAKA abaali emabega w’okuwenja emikono ne batuuka n’okutalaaga ebintu by’eggwanga eby’enjawulo okunoonya ababaka babeegatteko, bakyakalambidde nti keetonnye kagwake ekiteeso kyabwe kirina okukubaganyizibwako ebirowoozo mu palamenti.

Ku Lwokubiri lwa wiiki ewedde kkooti enkulu wansi w’omulamuzi, Justice Dr. Douglas Karekona Singiza yawa ensala yaayo mwe yategeerezza nti bakamiisona abana okuli Mathias Mpuga, Prossy Akampurira, Solomon Silwany ne Esther Afoyochan akasiimo baakafuna mu mikono mituufu.

Omubaka Joseph Ssewungu Gonzaga Ng'ayogera.

Bino we byajjidde ng'ababaka ababadde mu kuwenja emikono nga kwetabadde okukolimira abatwala palamenti okubamma amafuta n’emmotoka okutalaganga ebitundu eby’enjawulo banoonye ababaka, nga bamaze emyezi egisoba mu essatu nga bali ku nsonga eno.

Mpuuga ne banne era mukadde keekamu babadde basirifu ku nsoga zino nga tebazinyegako nga munnamateeka waabwe Asuman Basalirwa ye yavaayo n'ategeeza ng'ensonga bweziri mu kkooti.

Mpuuga ku Lwokubiri yategeezezza nti ababaka bano bandibanga bamulinako enge ne fitina kubanga ye talina musango gwe yazza era yeewuunya wa gye basomera amateeka.

Ekyali kirindiriddwa ye sipiika wa palamenti Anita Among okwanukula ababaka bano era nga mu bbaluwa eyafulumye Olwomukaaga bano yabagambye tajja kubawa mwagaanya kwogera ku nsonga yaabwe mu palamenti kubanga kkooti yamaze dda okusala eggoye.

Omubaka Ssekikubo (wakati) Ng'ayogera Mu Lukung'aana Lwa Bannamawulire.

Bw'atyo omwogezi wa palamenti, Chris Obore yawadde ababaka bano amagezi okwerabira byonna bye babaddeko badde ku mirimu gyabwe emitongole bakole. Omubaka w’e Kalungu West, Joseph Ssewungu Goganza agambye sipiika talina buyinza kubanga kuteesa ku nsonga eno mu palamenti era nga olunaku olw’enkya baakulangirira ekiddako.

Ono yagambye nti kino sipiika kye yakoze kisiiga ekifaananyi ekibi eri palamenti eri Bannayuganda kubanga kiraga buli annazza omusango mu palamenti waakuddukiranga mu kkooti okuzikiza obucaafu bwe. Ye Omubaka Theodare Ssekikubo naye yavuddeyo n'ategeeza nti sibakusa mukono kubanga tebamanyi muntu ki yawaaba mu kkooti ate nga bo nga abajulizi tebayitibwa kubaako kye bawoza.