By’ossaako essira ng’olonda kkoosi

EMBEERA y’ensi w’etuuse kati buli muyizi alina okugenderera ng’alonda amasomo g’ayiga oba okutendekebwamu okusobola okubaako ne ky’akola ekimuyimirizaawo mu bulamu obwa bulijjo.
Embeera y’obudde ekyuse ate ne tekinologiya ali ku misinde nga bingi ebyakolebwanga mu ofiisi byasikizibwa byuma omuwendo gw’abakozi abeetaagibwa ne gukendeezebwa mu bifo ebisinga.
Noolwekyo guno omulembe gwa kuyiiya kyakukola nga weekozesa sso si kukozesebwa kuba emirimu gikeeye.
Noolwekyo bw’oba olonda kkoosi y’ebyemikono gy’ogenda okusoma waliwo by’olina okussaako essira okusobola okufuna obulamu bw’omu maaso obweyagaza.
l Ebbanga kkoosi gy’etwala nakyo kikulu. Oyinza okwagala okusomera omwaka ogumu oba obutasussa myaka ebiri. Genderera kkoosi ezo ezitasussa myaka egyo.
l Londa kkoosi nga kijja kuba kyangu okufuna ettendekero w’onoosomera. Amatendekero agamu tegalina bikozesebwa oba ng’ojja kukaluubirirwa okutuukayo.
l Omuyizi ayagala okusoma ebyemikono olina okumanya ky’oyagala. Ekintu bw’oba okyagala okisoma bulungi era n’okukikola. Abamu babasasulira ebisale bya kkoosi, kyokka ne batakola mirimu egyo nga bamaze kubanga tebagyagala.
l Bw’oba olina essuubi ly’okweyongerayo okutuuka ku diguli, olina okulonda kkoosi eneekutuusa ku kirooto kyo. Okugeza bw’oba oyagala ebyokukanika oba ebyobulimi n’obulunzi kyangu okutandikira ku satifikeeti, n’odda ku dipulooma okutuuka ku diguli.
l Bw’oba oyagala kwekozesa londa kkoosi gy’otokaluubirirwa kwetandikirawo nga ssente teyeetaaga nnyingi. Okugeza ng’okutunga ekyalaani tekyetaagisa kupangisa maduuka manene, osobola okukolera w’obeera, okusiba enviiri oba okubajja.
l Waliwo kkoosi ezimu ng’omuyizi alina okuba nga yayita okubala. Ebiseera ebisinga bwe weesiba ku kkoosi gy’otoosobole weesanga ogigudde.
l Olina okusinziira ku busobozi bwo mu byensimbi. Kiba tekikola makulu ggwe okulonda kkoosi gy’otoomaleeko olw’ebbula lya ssente. Waakiri otandikira wansi n’otandika okukola nga bw’osonda okusoma kkoosi eya ssente ennyingi.
l Londa kkoosi erina akatale nga tojja kwetaaga kunoonya mulimu. Kkoosi ezimu abayizi bafuluma bayayaanirwa oba bw’amaliriza ajja kusobola okwetandikirawo omulimu.
l Oyinza okulonda kkoosi ng’ejja kukuyamba obutasaasaanya ssente mu maka. Okugeza bw’osoma okuddaabiriza ebyamasannyalaze oba ebyamazzi.
l Bw’oba oyagala okufuna ssente mu by’osoma londa kkoosi ng’omanyi by’onookola kijja kukwanguyira okufuna akatale. Okugeza bw’oba ofumba keeki mu kibuga oba okufumba emmere ssinga biba bya mutindo kyangu okufuna abaguzi ate mu bwangu ddala.