Amawulire
Bp. Tamale n'omukyala beebazizza Katonda olw'emyaka 35 mu bufumbo obutukuvu
OMULABIRIZI wa West Buganda Rt. Rev Henry KatumbaTamale n'omukyala Can Elizabeth Julia Tamale n'abaana baabwe basaze keeki bye beebalizaako Katonda olw'ebyo by'abayisizaamu.
Bp. Tamale n'omukyala beebazizza Katonda olw'emyaka 35 mu bufumbo obutukuvu
By: Ssennabulya Baagalayina, Journalists @New Vision
Bakatumba beebazizza Katonda olw'emyaka 35 egy'obufumbo bwabwe n'abaweeramu n'ezzadde ate okuwonya ye Bisopu akabenje n'omukyala okumuzza engulu ng'alongooseddwa okugulu.
Bino baabituukiddeko mu lutikko e Kako mu Masaka City era Bp Tamale n'alaga okunyolwa olw'ebikangabwa ebibuutukidde omwaka gwa 2022 ebitagufudde mwangu.
Anokoddeyo obubenje bw'ebidduka obusse abantu bangi, okufa okw'engeri zonna gattako ekyokya masomero ng'eryabaana ba muzibe omwafiira abamu wamu n'ababbi abagezaako okubba ebintu by'essomero lya Namungo Seed School e Mityana n'awalala.
N'agamba nti wadde obuweereza bwe obw'okubuulira enjiri ng'abutuukiriza naye bubaddemu okusomoozebwa kw'ebyenfuna ebyekanamye.
Yeebazizza Gavumenti olw'okuzimba enguudo mu kibuga Masaka n'agisaba ekole n'oluguudo lw'e Mutukula olutta abantu.
Yebazizza Kabaka olw'okulwanirira abantu be ng'abakubiriza okugaba omusaayi n'okulwanyisa Siriimu.
Bp Tamale alung'amizza Abakristaayo okutambulira mu kkubo ly'omulokozi Yesu Kristo.
Wano anenyeze Abakristaayo abeesamba ekirabo kya Katonda nga ye Kristo gwe yabatumira okubalokola.
Asambazze ebyogerwa nti Obukristaayo nti ddiini y'abagwira so ng'ekkanisa kibiina ky'abagoberezi ba Kristo.
Omulabirizi eyawummula Rt. Rev Samuel Kamya Ssemakula abasabidde omukisa ew'omukama abongere omukisa ogw'omuyiika.