Bannakibiina kya NRM batongozza Yellow Sunday n'ekigendererwa ky'okusabira Pulezidenti Museveni

Bannakibiina kya NRM batongozza enkola y’okusabira n’okujaguza ebikoleddwa gavumenti ya NRM emyaka 40 ,  n’okusabiranga pulezidenti Museveni mu kiseera kino eky’akalulu asobole okukaangulira waggulu omwaka ogujja.
Enkola eno yatongozeddwa omumbejja w’e Busoga era nga ye minisita weby’obulambuzi e Busoga  Hellen Namutamba,  era akulira akakiko akakunzi aka pulezidenti Museveni aka  (Activation Mobilization Drives).
Omukolo guno gwatongozeddwa ku kkanisa ya Fresh Fire Deliverance Ministries ey’omusumba  Twaha Muzira e Bulange Nabulagala ku ssande  eyatuumiddwa Yellow Sunday services.

Abakkiriza mu kusaba kwa Yellow Sunday

Minisita  Namutamba agambye nti, Yellow Sunday egendereddwaamu okusabiranga pulezidenti Museveni,  ayite mu kiseera kino bulungi, naasaba omusumba  Muzira okubeera ssentebe  w’enteeka teeka zino, nti baakusabiranga mu kkanisa 2 ez’enjawulo buli wiiki, nga batandikidde Kampala wabula baakwetoloola ebitundu by’eggwanga eby’enjawulo, naasaba ababkiriza okuyiira pulezidenti Museveni akalulu awangulire waggulu. Nga ne mu mizikiti bagenda kukola enteekateeka okutuukayo.
Omukolo gwetabiddwaako n’omuwandiisi wa pulezidenti ow’ekyama Dr. Kellen Kayonga, asabye bannayuganda okulabira ku buntubulamu bwetulina mu ggwanga bayiire Museveni akalulu, nti kubanga n’ekkanisa zonna yaaziwa obwogerero kati zeegazaanya awatali abakuba ku mukono, naasaba emirembe egyo, tumusiime nga tumuwa akalulu awangulire waggulu.

Abakkiriza mu kusaba ku kkanisa yomusumba Twaha Muzira eya Fresh Fire Deliverance minisitries e Bulang Nbaulagala

Yaayongeddeko nti, Uganda ye nsi esoose mu Africa okuba n’omuwendo gw’ababundaabunda abasinga obungi, ng’ensi zonna ezituliraanye awali embiranye baaddukira wano okufuna obubudamo, kubanga lyerimu ku ggwanga erisingamu emirembe. Awaddeyo Eentebbe 200 eri abakkiriza n’abato aba Sunday school naabawa entebe 100.
Omusumba Twaha Muzira  yeebazizza pulezidenti Musevei gw’agambye nti aleese eddembe ly’okusinza nga kati abalokole baasaba bulungi , ekitaaliwo mu mirembe egyayita ng’abalokole baasaba beekwese.
Nga ye nsonga lwaki bakuba amavi ku ttaka nga basabira Museveni abeewo emyaka mingi nti era ye nsonga laki  ye,  yeewaayo okumunoonyeza akalulu awatali kwekwekerera olw’emirembe gy’okusinza gyeyaleeta egikubukadde mu ggwanga. Naasaba minisita Namutamba amutuusize okusaba kwe eri pulezidenti okubakwasizaako ku ky’okuzimba ekkanisa yaabwe etuuke ku mulembe n’okuzzaako TV yaabwe ey’ekkanisa eyaaggyibwa ku mpewo.

Minisita Namutamba ne Dr Kayonga mu kutongoza okusaba kwa Yellow Sunday

Wano Kayonga amusabye awandiike ebbaluwa agiwe  minisita Namutamba agituuse ewa pulezidenti Museveni, ensonga eno ekolweko amangu ddala ng’akalulu kawedde, ate ekya TV  neeyeeyama  nti agenda kukikolako nga ye okulaba ng’edda ku mpewo.
Bawaddeyo ekiweebwayo ekivudde ewa pulezidenti Museveni, n’abakkiriza mu kkanisa omuli kwaaya n’abavubuka nabo nebaweebwa akasiimo okuweereza mukama.