Kkooti esindise 4 e Luzira lwa kubba abalimi ba kkooko obukadde 800!

KKOOTI y'e Kawempe esindise abasajja 4 ku limanda e Luzira lwa kutwala ssente obukadde 800 ez'abalimi ba kkooko mu lukujukuju.

Joshua Conrad Tumusime, musigansimbi Tukman Muhammad Ahmed, Edrisa Serunkuma ne Rodgers Twebaze be basimbiddwa mu kkooti y'e Kawempe lwa kufuna ssente obukadde 800 ezaali eza Bundikaghoro Cocoa Farmers Cooperative society Limited.

Abavunaanibwa Nga Bali Mu Kagguli (1)

Kigambibwa nti Tumusiime, Tukman, Serunkuuma ne Twebaze baawuddiisa abalimi ba kkooko mu distulikiti y'e Bundibugyo nga babasuubizizza okubagulako kkooko waabwe ttani 61 mu mwezi gwa January, 2025 eyali abalirwamu ssente akawumbi 1.95.

Bano baalimbalimba abakulira cooperative eno okuli ssentebe waabwe Francis Bukama, Peter Kandole ne Rev.Cosmus Ndabughilaha okukkakkana nga babatutteko kkooko waabwe eyali akaziddwa obulungi kyokka oluvannyuma ne baggyako amasimu gaabwe.

Kino kyaleetera ab’ekibiina okwekengera era ne baggulawo omusango ku bantu bano nga n'abamu bakwatibwa ku nsalo nga bagezaako okufuluma eggwanga.

Omulundi ogwasooka lwe balabikako mu kkoooti Tumusiime yakkirizza omusango guno era oluvannyuma lw'okukunyizibwa yaleetako obukadde 30 kw’ezo 800 ezibabanjibwa era n’asuubiza okuleeta endala ng'aweereddwa obudde.

Nga November 27, 2025, omulamuzi w'ekkooti eno Roselyne Nsenge lwe yabadde alina okuwa ensala ku musango guno ne Tumusiime aleete ssente endala ze yasuubiza okuleetako wabula bana bano bwe baleeteddwa mu kaguli Tumusiime n’abuuzibwa oba aleese ssente wabula yasabye kkooti emwongereyo ennaku 14 okunoonya obukadde obulala 30 abuleete lwe banaddamu okuleetebwa mu kkooti.

Omuwaabi wa gavumenti, Sharon Nabunnya yategeezezza kkooti nti omwaka guweddeko abalimi beetaaga okulya kulisimaasi ne ssente zaabwe

Nabunnya yategeezeza nti Tumusiime okubeera omukulu mu kuzza omusango guno tasaanidde kukkirizibwa kuyimbulwa ku kakalu ka kkooti newankubadde abalala basatu bakkirizibwa .

Omulamuzi Nsenge yasabye oludda oluwaabi okubeera olukkakkamu balinde abantu ba Tumusiime okuleeta ebiwandiiko ebimu e Luzira by’agenda okussaako omukono afune obukadde 30 bw’anaawa abalimi nga bakomyewo mu kkooti okusinga okumusindika e Luzira okumala emyaka etaano nga tebalina kye bafunyeemu.

Nsenge yasindise Tumusiime mu kkomera okutuusa nga December 12 lw’anaddizibwa mu kkooti ng’aleese obukadde 30 bwe yasuubiza.