Aba Brooks Agro Farm baleese amakula e Mmengo

OMUKUBIRIZZA w'Olukiiko lw'Abataka abakulu b'ebika Augustine Kizito Mutumba yeebazizza abantu ba Buganda olw'okumalirira ne balabirira Kabaka waabwe. 

Enkola eno, Omutaka Mutumba nga ye Mukulu w'ekika ky'ekkobe agamba nti esobozesa Kabaka ate okulabirira Abasiige n'abawereeza mu mbiri n'amasiro ag'enjawulo bwatyo ne yeebaza abantu olw'okusobozesa Kabaka okulabirira abantu be ababeera mu bifo ebyo. 
Okwebaza kuno akukoledde mu Lubiri e Mmengo bwabadde atikkula abantu okuva mu kitongole ki Brooks Agro Farm, eggombolola okuli Mumyuka Nakawa-Kyadondo, Bukomero-Ssingo ate ne Kangulumira-Bugerere abaleese Amakula ga Kabaka.

Denis Bugaya ng'ayogera

Omutaka Mutumba asinzidde wano n'asomooza abantu okukomya okulagajjalira emirimu gy'ebika byaabwe ng'ate emirala mu by'obufuzi, bizinensi n'enzikkiriza bagikola bulungi n'abasaba okwongera okuwagira emirimu gy'ebika bikulakulane. 

Katikkiro w'ebyalo bya Kabaka, Moses Luutu nga y'avunanyizibwa ku kukunganya amakulu yeebazizza eggombolola ezireese Amakula embuga era n'alangirira eggombolola ebiri ezisinze okuleeta Amakula okuli Lubaga ne Ssabaddu era Namwama n'azikwasa ebirabo nga Ntebe n'emmeeza ya ofiisi.

Omwogezi wa Buganda Land Board, Denis Bugaya ng'era ye Dayirekita wa Brooks Agro Farm e Mawokota asabye kkampuni zonna mu Buganda okuteeka eky'okuleeta amakula ewa Kabaka ku Kalenda yaabwe ey'omwaka okutambuza obulungi emirimu gya Kabaka. 

Omukubirizza w'Olukiiko lw'Abataka abakulu b'ebika Augustine Kizito ng'aliko byanyumya ne Denis Bugaya

Bugaya era alambuludde ku ebyo ebintu bye baleese okuli ttule z'amaggi 500, ente n'ebirala. 

Omukolo gwetabiddwako Omukulu w'Olubiri lw'e Mmengo  Ssewava, Bannabyabufuzi okubadde Abataka ba Palamenti Christine Nakimwero Kaaya Omukyala owe Kiboga, Dr. Kefa Kiwanuka Owa Kiboga East. Abeegwanyiza obubaka bwa Palamenti okuli John Bosco Lubyayi- Mawokota South ne Winfred Nakandi- Nakawa East n'abalala