Bannakampala basoomoozezza KCCA ku muddo gw’esimbye

BANNAKAMPALA batadde KCCA  ku minzaani ku maanyi g’etaddemu okusimba omuddo n’emiti mu kibuga nti gayinza okugifa obusa kubanga terina nkola ya
kugubeezaawo.
Balaze nti omusana gutandise kyokka tebalaba mmotoka zissiddwaawo  wadde abaserikale baayo okusomba amazzi okugufukirira. Emyezi giweze ena nga KCCA ezzeemu okusimba omuddo n’okuttukiza ebikwekweto ku bantu abagutambuliramu. Kino kibadde kigusobozesezza okuddawo ne Bannakampala bangi bagondedde
ebiragiro byayo kyokka abamu beewuunya emiti n’omuddo bwe bigenda kubeerawo mu kibuga nga tebifukiriddwa.
Mmeeya wa Kampala Central, Salim Uhuru yagambye nti bo nga bannabyabufuzi bamaze ebbanga nga bawa KCCA amagezi nti bakole pulaani esobola okubeezaawo
omuddo ogwo nga bagufukirira mu kifo ky’okukwata obukwasi abagutambuliramu. “Okufukirira omuddo si kya  bbeeyi nnyo ate ne mmotoka ezifukirira bazirina naye tebakikola,” Uhuru bwe yagambye. Yalabudde nti ebikolebwa ebyo baba bali ku nkola ya kulaga ssente kye zikoze naye tebalina mutima gutereeza kibuga n’okukirabisa obulungi.
Kyokka omwogezi wa KCCA,Daniel Nuwe Abine yawabudde nti bagenda kwongera amaanyi mu kugulabirira n’okufukirira era n’asaba abantu okwewala okugutambuliramu
kubanga anaakwatibwa agenda kuvunaanibwa.
Omu ku bakulembezeb’abasuubuzi abatundira ebintu mu Kampala, Umar Kalyango yagambye nti okusimba omuddo kirungi nnyo era buli omu akiwagira naye KCCA
terina nkola egubeezaawo.
Lwaki tebateekawo ssente zifukirira muddo. Bannakampala nga bwe tuwagira enkola  no era n’amateeka tugagoberera kati ne dayirekita ayambeko okugufukirira. Omwogezi w’abasuubuzi mu Kikuubo, Samuel Muyomba yeewuunyizza KCCA okuleka omuddo gw’esimba ng’ekozesezza ssente kyokka n’egusimba mu musana ate n’eguleka ne gukala nga tegufukiridde. Yategeezezza nti kukakasa nti Bannakampala bakwata
amateeka n’okwagala ekibuga kyabwe, batandike okufukirira muddo ogwo gunyirire balabe oba abantu banaagutambuliramu.
Abasuubuzi abakolera ku luguudo lwa Namirembe Road beewuunyizza KCCA bwe yasimbye emiti gya ffene ne ovakedo mu kakuubo akali wakati wa Allen Road okwambuka ku Blue Room gye buvuddeko mu musana ogwememula era mingi
gikaze.
Ssentebe w’abavuzi ba ttakkisi mu ggwanga mu kibiina kya UTOF, Rashid Ssekindi yasiimye KCCA okubeera n’entegeka etereeza ekibuga kyokka eteekewo
abantu baayo bafukirire omuddo n’okulung’amya abantu abaguyitamu gusobole okubeerawo.“Buli muntu ayagala ekibuga ekirungi naye KCCA eyongere amaanyi mu kulabirira n’okufukirira ebintu bigenda kwekola byokka ekibuga kinyirire,” Ssekindi bwe yagambye. Enguudo ez’enjawulo mu kibuga okuli Luwum , Namirembe Road, Lugogo Bypass, Nile Avenue, William Street, Kampala Road, Bombo Road, Ntebe Road n’ebibangirizi nga ekya Watoto ne ku Ggaali y’omukka basimbyewo omuddo era walabika bulungi kyokka basabye KCCA egufukirire mu biseera by’omusana ogutandise