BANNADDIINI BAWADDE OBUBAKA BWA SSEKUKKULU;Dr. Kazimba asabye abeebyokwerinda okweddako

SSAABALABIRIZI w’Ekkanisa ya Uganda, Dr. Samuel Stephen Kazimba Mugalu awadde obubaka bwa Ssekukkulu n’omwaka omuggya mw’asabidde ebitongole by’ebyokwerinda okuba n’omutima ogw’obuntu, n’asaba n’abantu baabulijjo obutasosonkereza ba byakwerinda.
Yagambye nti abeebyokwerinda emirundi mingi bazze balabikira mu kkamera nga beeyambisa amaanyi agayitiridde oluusi agatagoberera na mateeka nga bakikola ku bantu baabulijjo abatalina wadde ekyokulwanyisa. Kwe kubasaba nti nga bakola omulimu gwabwe, bagoberere amateeka ate nga bassaamu ak’obuntu.
Dr. Kazimba yakuutidde abazadde na bonna abavunaanyizibwa ku baana okubawa obudde batuuleko nabo okumanya bye bayitamu, babayigirize emirimu wamu n’okwogerako nabo ku kwewala abantu be yagambye nti beesomye okuyingiza abaana mu mize egitakkirizibwa Katonda nga bakozesa ssente n’okwekweka mu kubafunira bbasale ez’okusoma.
Ng’asinziira mu lukung’aana lwa bannamawulire olwatudde mu bimuli by’ekitebe ky’Ekkanisa ya Uganda e Namirembe, Ssaabalabirizi Kazimba yakuutidde Bannayuganda bonna nti nga balya n’okusanyuka, bajjukire nti n’enkya gyeruli, kubanga ennaku enkulu nga ziwedde, ate wajja kusigalawo obuvunaanyizibwa obw’okulabirira famire n’okuweerera abaana.
Yakubirizza Abakristaayo okugenda mu maaso nga bawagira emirimu gy’Ekkanisa omuli n’okusiibula abamu ku balabirizi abanaawummula mu 2025 n’okuteekawo abaggya mu mirembe awatali kusika muguwa.
Yasabye abantu bonna okwetaba mu nteekateeka za Gavumenti ng’okugema omusujja gw’ensiri okunaabaawo mu April wa 2025.
Yayanjudde omulamwa gw’omwaka ogujja: Okulabira ku Katonda nga tukola obulungi (Abaggalatiya 6:9).
Yalaze n’ebikulu ebituukiddwaako mu 2024 omuli okuggulawo Lutikko omuli eya All Saints Nakasero, okumalayo ebbanja lya Church House, okussaako abalabirizi, abaawule wamu ne ba Canon, kw’ossa enkung’aana z’enjiri, ez’abavubuka, ez’abasomesa n’abakulu b’amasomero.