Amawulire ga Bukedde gayayaanirwa e Iganga lwa lutalo lwa Russia

Bya Ivan Wakibi

AMAWULIRE g'olupapula lwa  Bukedde  gakutte abatuuze b'e Iganga omubabiro olw'okwagala okugoberera ebigenda mu maaso ku lutalo lwa Russia ne Ukraine.

Okuva Bukedde bwe yatandika okufulumya ebigenda mu maaso mu lutalo olwo wakati wa Ukraine ne Russia, abatuuze mu kitundu bettanira olupapula lwa Bukedde olw'engeri gyerusengekamu ebipya ku lutalo luno.

Abatuuze bakeera mu bifo we batundira amawulire mu bungi ne bagula kkopi za Bukedde okwesomera ku bipya n'ebyekusifu ku lutalo luno ebitabeera mu mpapula ndala.

Kyoka abatalina ssente waakiri basoma emitwe ng' amawulire gali ku midaala.

Batenderza Bukedde ku ngeri gy'esengekamu amawulire gano era ne bawakana kw'ani asinza ebyokulwanyisa ebyamaanyi.

Ekifo webasinga okukungaanira mwe muli; okumpi ne Post Bank awatuukira amawulire ne balyoka bagasaasanya mu bifo ebirala mu kitundu.

Wano bakeerawo ssaawa 12:00 ez'oku makya ne bamalawo akaseera nga banyumya ku lutalo.

Benson Muyinda, omutunzi w'amawulire mu kifo kino ategeezezza  nti okuva Bukedde lwe yatandika okuwandiika ku lutalo luno, obungi bw'amawulire ge batunda bweyongerako.

Waliwo enjawulo y'amaanyi kati kubanga emabegako nga waliwo agafiika naye kati gatundibwa ng' ate nabamu bagakolera wooda okwewala okufiika.

‘‘Tusaba Bukedde eyongere okuwandiika ku lutalo luno kubanga abantu balugoberera nnyo si wano wokka wabula ne mu nsi yonna ate naffe kitwongerako enyingiza kubanga gye tukoma okutunda gyetukomya okufuna,’’ bwe yagambye.