Alien Skin ne Pallaso byongedde okubatabukako

EBY’ABAYIMBI Alien Skin (Patrick Mulwana) ne Pallaso (Pius Mayanja) byongedde okwonooneka ebibiina eby’enjawulo ebikulembera abayimbi ne bannabitone bwe bibakalize emyezi mukaaga nga tebayimba mu bivvulu.
Mu ngeri y’emu poliisi eweze abayimbi okuddamu okutambula n’ebibinja by’abavubuka ebimanyiddwa nga ‘eggaali’ n’ebawa omuwendo ogw’essalira gwa bantu bataano be balina okutambula nabo.
Kiddiridde poliisi okukizuula ng’abayimbi abatambula n’ebibinja by’abavubuka bwe bisusse okukola effujjo omuli okukuba abantu n’okubanyagulula ng’effujjo lyeyolese nnyo mu bivulu omuli; Enkuuka mu Lubiri e Mengo ne mu kivvulu ky’e Mpele ekyabadde e Buloba.
Omwogezi wa poliisi mu Kampala n’emiriraano, Patrick Onyango yagambye nti omuyimbi yakkiriziddwa okutambula n’abantu bataano bokka omuli; DJ, maneja, owebyensimbi, omuwandiisi n’omukuumi.
Ebibiina ebikulembera abayimbi byasinzidde mu lukung’aana lw’abaamawulire olwatuuziddwa eggulo ku National Theater nga lwetabiddwaamu akakiiko akatwala bannabitone n’ebiyiiye mu ggwanga aka National Cultural Forum Uganda (NCFU), ekibiina ekigatta abayimbi ki Uganda Musicians Associations (UMA), ekibiina ekitaba bapulomoota ekya Uganda National Promotors’ Association (UNEPA), poliisi n’ebalala.
Amyuka ssentebe wa NCFU, Charles Batambuze yannyonnyodde nti nga abakulembeze baatudde ne beekenneenya effujjo eryakoleddwa abayimbi mu bikujjuko by’ennaku enkulu n’okumalako omwaka ne babaako amateeka n’ebiragiro bye baataddewo omuli;
l Omuyimbi yenna aneenyigira mu bikolwa eby’effujjo ebissa ebyokwerinda kw’abadigize mu katyabaga, waakussibwako ekkoligo ly’obutaddamu kulinnya ku siteegi era nga baatandikidde ku Alien Skin ne Pallaso era bannannyini bifo tebalina kukkiriza bayimbi bano kuyimbira mu bifo byabwe okutuusa ng’ebbanga liweddeko.
l Poliisi okukwata abayimbi bonna abaakola effujjo ku Bannayuganda mu bikujjuko by’ennaku enkulu ne bawa amagezi buli muntu eyakubibwa ekibinja ky’omuyimbi Alien Skin mu Nkuuka mu Lubiri e Mengo agende ku poliisi aggulewo emisango.
lAbayimbi ne bannabitone baalagiddwa okukozesanga abakuumi abamanyiddwa okuli poliisi ne bakanyama abali mu bibiina ebyakakasibwa ebitongole by’ebyokwerinda si kulonderera buvubukavubuka.
lAbayimbi balina okukeberwa nga tebannayingira kifo ekisanyukirwamu naddala nga balina ababatambulirako ku bbali.
l Abategesi b’ebivvulu baalagiddwa nti omuyimbi yenna singa anaagezaako okuyimba mu ngeri evvoola muyimbi munne, bamugobe ku siteegi.
l Bapulomoota baalagiddwa okutandika mbagirawo okukolanga endagaano n’abayimbi be bawa emirimu omulina okuteekwa obuwaayiro n’obutangira okukola effujjo.
BOOGEDDE KU BAKOLA EFFUJJO
Daniel Kazibwe amanyiddwa nga Ragga Dee yalaze ennaku olw’okubanga ekitiibwa ky’omulimu gw’obuyimbi kye baatakabanira okuzimba ate abantu ab’olubatu bakisaanyaawo n’ategeeza nti tebayinza kutunula butunuzi era baakulwana effujjo lino balisaanyeewo.
Bino we bijjidde ng’omuyimbi Pallaso alina ekivvulu mu May w’omwaka guno wadde ng’emyezi mukaaga egyamukaligiddwa gigenda kuba teginnaggwaako.
Olutalo lwa Pallaso ne Alien Skin oluvuddeko amateeka gano amakakali lwatandika mu May wa 2023, Pallaso bwe yapacca Alien Skin empi abantu ne banenya Pallaso wadde nga bangi ate ku luno bwe yalumbye amaka ga Alien n’ayasaayasa ebintu bye okwabadde ne mmotoka bbiri ate baamusuusuuse.
Mu nkuuka, era abavubuka ba Fangon aba Alien Skin basiiwuuse empisa ne bakuba abantu nga kigambibwa nti ne Alien Skin yennyini yasooka kugamba abantu abamuwagira bawanike emikono nga bw’abagamba nti awanika kitaasa ye olwo n’alyoka ateera abataawanika abavubuka be ne babakolako effujjo