Akulira URA atenderezza Bukedde

AKULIRA ekitongole ekisolooza omusomo mu ggwanga ekya URA ,John Musinguzi, atenderezza Bukedde olupapula , olw'okusobola okutuusa ku bantu obubaka bw'ekitongole kino, ne basobola okuwulizaganya obulungi.

Kidiridde Vision Group etwala ne Bukedde, okussaawo enkola mu lupapula lwa Bukedde gye bayita 'Buuza Kamisona', abasomi n'abantu ab'enjawulo mwe babuuliza ebibuuzo ebikwata ku nsasula n'ensolooza y'omusolo, olwo Komisona n'abiddamu.

Musinguzi ategeezezza nti guno gwe mulundi ogusookedde ddala, ekitongole ky'omusolo, okusobola okwogerako n'abantu babulijjo ne bamanya ebibanyiga ku musolo, era ne basalira wamu amagezi nga bayita mu lupapula luno.

Abyogeredde ku kitebe kya Vision Group leero, gy'abadde n'abamu ku bakozi ba URA abalala,  nga bongera okugaziya enkolagana yaabwe ne kampuni eno, okwanukula ebubuuzo ne mu luzungu.

Kino kyakukolebwa nga buli Lwakuna mu lupapula lwa The New Vision, abantu abasomi mwe bagenda okuyisa nga ebibuuzo byabwe mu Lungereza, olwo ye Kaminsona n'abyanukula.

Asiimye Bannayuganda olw'okuwa omusolo era n'ategeeza nga bwe bategese olukungaana gaggadde eri abasuubuzi, okwongera okubannyonnyola ebikwata ku musolo n'okuwulira ebimu ku bibanyiga. Agenzeeko ku Bukedde Ffa Mma era emboozi ebadde bweti nga Pius Kyanda.

Enenyezza abamu ku bafere aberimbika mu biti eby'enjawulo nga befuula ababayambako okusasula omusolo kyokka ne bababbako ssente enyingi, ekivumaganyisa gavumenti nti omusolo mungi.

Ye akulira kampuni ya Vision Group Don Wannyama, asiimye Komisona General Musinguzi , olw'enkolagana eno gy'agambye nti eyambye okuziba omuwaatwa ogubaddewo eri abakungaanya omusolo n'abaguwa.

Asabye Musinguzi okwongera okubawagira ku project ez'enjewulo gamba ng'empaka z'ennyimba z'abajulizi ezibaawo mu kiseera ky'okulamaga e Namugongo n'ebirala bingi.