Akabenje katuze 2 ku lw'e Ssembabule mmotoka bwe zaambalaganye bwenyi ku bwenyi

ABANTU babiri bafiiriddewo n'abalala ne batwalibwa mu ddwaaliro nga bali bubi  nnyo, mu kabenje akagudde e Kagologolo ku luguudo oluva e Villa okudda e Sembabule.

Abafudde kuliko ddereeva w'emmotoka ekika kya Noah, Sharif Ntale omutuuze w'omu Ntuusi ne Harriet Nalubega 15 omutuuze w'e Bukunda so ng'omugoba wa tippa forward  nnamba UBR 446 Y , Aggrey Bulikoowa 43 ng'abadde akolera mu National Water e Mutukula alumiziddwa nnyo.

Mmotoka ya Noah eyaweddewo

Kigambibwa nti akabenje kavudde ku mmotoka ya toyota Noah nnamba UA 250 DA ekola takisi, okwabika omupiira n'eyambalagana ne tippa nnamba UBR 446 Y, abantu kwe kufa n'abalala ne bafuna ebisago.

Omwogezi wa poliisi e Masaka Twaha Kasirye, ategeezezza nti , abalumiziddwa, batwaliddwa okufuna obujjanjabi naye ng'embeera mbi ddala, emirambo gy'ababiri ababadde mu Noah, gitwaliddwa mu ggwanika e Masaka n'emmotoka ne zitwalibwa e Bukomansimbi ku poliisi.