Mmengo etongozza ekitingole ky'ebyobusuubuzi kyetuumye Mmengo Chambr of commerce ltd

KATIKKIRO wa Buganda Charles Peter Mayiga agambye nti teri muntu agaggawala mu nsi okuggyako ng’aliko kyatunda bwatyo n’akunga buli muntu okufuba okubeerako ne kyatunda omuva ensimbi ezisobola okumubeezaawo.

Mayiga ayongerako nti omuntu asobola okubeerako ekyamaguzi kyatunda oba obuwereeza bwakola n’afunamu ssente ezimubeezaawo ng’enteekateeka eno yeesaanye okubeera mu buli birowoozo bya muntu mu kiseera kino ng’Omwaka gwakatandika.

Okulambika bwati asinzidde ku mukolo kwatongolezza ekitongole ky’Obwakabaka ekituumiddwa Mengo Chamber of Commerce Ltd ekigenda okutumbula obusuubuzi mu bantu ba Buganda n’agamba nti balubirira okuyita mu busuubuzi buno okusitula embeera n’ebyenfuna by’abantu.

John Fred Kiyimba ng'ayogera

“Obusuubuzi ly’erimu ku makkubo lyetuyinza okuyitamu okukyusa obulamu bw’abantu. Teri muntu agaggawala mu nsi okuggyako ng’aliko kyatunda. Oteekwa okubaako ky’otunda oba kyamaguzi kikalu nga langi oba pulasitika oba kya byabukugu nga nze ayinza okutunda obukugu bwange mu mateeka; teriiyo ngeri yonna.”

Olukiiko oluddukanya ekitongole kino lukulirwa Omukungu John Fred Freeman Kiyimba ng’ono era ye Ssentebe wa Buganda Twezimbe, ng’amyukibwa Omukiise mu Lukiiko lwa Buganda Steven Kayiwa. Bammemba kuliko Sarah Kironde Ssemanda, Rita Namyalo, Robert Nsereko, Hajj Musa Mugere okuva mu Luuka Plastics Ltd, ate ne Francis Asisi Kimbowa nga ye Muwandiisi ng’akolera mu Buganda Royal Law Chambers Ltd.

Kiyimba ku lwa banne alambuludde ku bingi byebagenda okukola okuli okukwata ku Mukono abavubuka n’abakyala okunyikirira obusuubuzi, okuyamba ku beegassi, okutegeka emyoleso, okukwana emikwano gy’ebweru.

Katikkiro Mayiga ne Bammemba b'Olukiiko lwa Mengo Chamber of Commerce olwatongozeddwa

Katikkiro Mayiga yagambye nti obusuubuzi mu Uganda bwatandikira wano mu Buganda ng’ekiseera kituuse abantu ba Buganda okuddamu okukola obusuubuzi mu ngeri enteeketeeke etuuka ne ku ddaala ly’ensi yonna.

Minisita w’obulimi, Obwegassi, Obusuubuzi n’obuvubi mu Buganda, Hajj Amisi Kakomo alazze essuubi ng’ekitongole bwekigenda okugasa abasuubuzi mu Buganda okwekulakulanya, okunoonya obutale, okugatta omutindo ku bintu ebitwalibwa mu katale, enkolagana y’abasuubuzi saako okugatta abasuubuzi ne Bannamakkolero.

Omukolo gwetabiddwako Minisita w’amawulire n’okukunga abantu, Israel Kazibwe Kitooke, abakungu abakulira ebitongole by’Obwakabaka