Abalimi ababadde bakaaba ekyeya bafunye essuubi

OLUVANNYUMA lw'ekyeya eky'amaanyi okusumbuwa abantu mu bugwanjuba bw'eggwanga, abalimi n'abalunzi mu bitundu bino bafunye ku kamwenyumwenyu bwe balaze bye basuubira mu pulojekiti egenda okubayamba okutumbula eby'obulimi.
Pulojekiti eyitibwa Uganda Climate Smart Agricultural Transformation Project (CSATP) nga yatongozebwa mu November 2024 n'omulamwa ogw'okukwatizaako ku balimi n'abalunzi okugaziya pulojekiti zaabwe.

Abalimi

Nga basinziira mu disitulikiti ya Kiruhura ne Kyegegwa abakungu gye baakyadde okulaba abalimi bwe bagifunyemu, bagamba nti ebayambye nnyo okufuna mwebyo bye balima nga tebakoseddwa nkyukakyuka ya budde.
Karegyesa nga mulimi okuva mu kibiina kya Bwijukye Abesigana Farmers Group e Kiruhura yagambye nti balina essanyu kuba nti enkola eno egenda kubayamba okwongera omutindi kubintu bye balima ssaako okulunda olwo basobole okufunamu ekiwera.
"Tubadde tusomoozebwa kuba oluusi omuddo gwetuliisa ente tugureeta bulungi mata mu nte zaffe. Tukama liita 5 buli nte, naye tusuubira nti singa pulojekiti eno ennyikira, tujja kuba tusobola okukama liita 20 ku 25 buli nte." Karegyesa bweyayongeddeko.
Pulojekiti ya Uganda Climate Smart Agricultural Transformation Project yareteddwa World Bank nga yataddemu obukadde bwa doola 350 munkola egenda okumala emyaka 6 ng'etekebwa munkola minisitule y'ebyobulimi, obulunzi n'obuvubi mu ggwanga.

Abalimi

Pulojekiti eno egenda kutwalibwa mu disitulikiti 69 okuli neezo ez'ababundabunda ng'esubirwa okuganyula abantu abasoba mu bukadde obusatu. Munkola eno abalimi n'abalunzi batoola ebitundu 20 ku 100 olwo Gavumenti neyongereko ebitundu 80 ku 100 ku byetaago byabwe.
Omukungu avunanyizibwa kukusembeza enkola z'ebyobulimi eri abantu okuva mu minisitule y'ebyobulimi, obulunzi n'obuvubi, Henry Nakelet Opolot  yakubirizza abalimi n'abalunzi okwettanira pulojekiti eno kuba ejja kubayamba okutumbula pulojekiti zaabwe.