Abagambibwa okusaasaanya ebicupuli bya ssente ne ddoola bakwatiddwa poliisi

Abantu babiri abagambibwa okwenyigira mu kusaasaanya ebicupuli, bya ssente ne ddoola, bakwatiddwa poliisi e Bugiri.

Ali Mutale 49 nga mutuuze w'e Nawanyingi e Iganga ne Allan Kyemba 32 ow'e Walugogo mu Iganga, be bakwatiddwa mu kikwekweto mwe basoose okubakettera.

Kino kiddiridde Betty Wazenda 46 ow'e Mugona mu muluka gw'e Ndifakulya mu ggombolola y'e Kapyanga e Bugiri, okumusiba ebicupuli bya bukadde 3.

Bano,babakwatidde mu Toyota premio  nnamba UAN 003Y era nga kigambibwa nti baludde nga banyaga abantu e Bugweri, Bugiri, Iganga n'ebitundu ebirala, nga babalimba ne ddoola wamu ne ssente ez'ebicupuli.

Omwogezi wa poliisi mu Busoga East, Micheal Kasadha, agambye nti, okubuuliriza, kugenda mu maaso era bano babadde babanoonya.