Abaduumizi abaalagira abajaasi okudduka ng'omulabe wa Al-Shabaab abalumbye bavunaaniddwa gwa butiitiizi
Abavunaaniddwa ye Maj John Steven Oluka 48 ne Maj Patrick Zakock Obor nga bakolera mu ttabi lya UPDF eriyitibwa Zulu Battalion ekibinja ekya 38 nga be bakulira n'okuduumira enkambi ya UPDF e Somalia baasimbiddwa mu kkooti y'amagye e Makindye ne bavunaanibwa ogw'obutiitiizi.
Oluka ku kkono ne Obor mu kkooti y'amagye e Makindye
By Margaret Zalwango
Journalists @New Vision
Abavunaaniddwa ye Maj John Steven Oluka 48 ne Maj Patrick Zakock Obor nga bakolera mu ttabi lya UPDF eriyitibwa Zulu Battalion ekibinja ekya 38 nga be bakulira n'okuduumira enkambi ya UPDF e Somalia baasimbiddwa mu kkooti y'amagye e Makindye ne bavunaanibwa ogw'obutiitiizi.
Bano era basomeddwa omusango gw'okulemwa okuduumira abajaasi be baali bakulira okulumba omulabe eyali alumbye nga ye yali owa Alshabab.
Emisango gyombi gyabasomeddwa ssentebe wa kkooti Brig Gen Freeman Robert Mugabe era bombi ne bagyegaana nti si bituufu.
Omuwaabi wa gavumenti Pte Regina Nanzala yategeezezza kkooti nti okunoonyereza kukyagenda mu maaso n'asaba baweebwe obudde okutuusa nga September 12 , 2023 lwe banadda okubuulira kkooti okunoonyereza we kunaaba kutuuse.
Abawawaabirwa baabadde bawolerezebwa Pte Priscilla Kakande, Capt Nsubuga Busagwa ne Elizabeth Nyansingwa.
Oludda oluwaabi lugamba nti bino byaliwo nga May 26 abajambula aba Alshabab bwe baalumba enkambi ya UPDF e Bulomerer ne batta abajaasi 54 ate abalala ne bafuna ebisago ebyamaanyi.
Kigambibwa nti Alshabab bwe yalumba enkambi ya UPDF e Bulomerer , Oluka ne Obor baalagira abaajasi okudduka baabulire ekifo kyokka ng'omulabe yali amaze okusalako enkambi. Kino kikontana n'amateeka agafuga ebyentalo.
Oludda oluwaabi era lulumiriza nti abakulu bano baalemwa okuduumira abajaasi abali wansi waabwe okulumba omulabe ekikontana n'amateeka agafuga ba kamanda mu ntalo.
Obulumbaganyi buno Pulezidenti Museveni ya buteeka ku butiitiizi bawawaabirwa be yagamba nti ssinga baakola era ne batuukiriza obuvunaanyizibwa bwabwe tewandibadde kufa kwa bajaasi ba UPDF.