Ababadde baluse olukwe lw’okubba owa Romi Wine babakutte

Bya Stuart Yiga
 POLIISI ekutte eyali omukozi w’Omuggagga akulira kampuni ya Romis Wine, kubigambibwa nti yabadde yeekobanye n’abasamize okufera ku muggagga ssente eziri eyo mu kawumbi nga bayise mu lukujjukujju lw’obuwanga bw’abafu.

Omuggagga wa Romis Robert Migadde (ku ddyo) ng'ali n'abaserikale b'ekitongole kya Crime Intelligence Unit baliko bye babuuza Umar Ssempala n'abasamize be baakutte (

Umar Ssempala amanyiddwa Ssemaka Musiraamu era nga ye nannyini kkampuni y’ebizigo eya Sus Associates Limited, ye yakwatiddwa Poliisi n’abasamize be yabadde aluse nabo olukwe lw’okufera omuggagga.

Abasamize  abaakwatiddwa kuliko; Ssaalongo Charles Ssebunnya, omutuuze w’e Luweero, Ssaalongo Christopher Kakooza, omutuuze w’e Kayunga-Bugerere wabula nga yakwatiddwa Mutukula ku nsalo ya Uganda ne Tanzania, ne David Wampamba Kibanga, omutuuze w’e Busiika.

Poliisi ng'esazeeko faamu ya Migadde e Lyantonde

Kigambibwa nti oluvannyuma lwa bbanka okutwala ebimu ku bintu bya Umar Ssempala, yasalawo okukwatagana n’abasamize ne bayiiya engeri y’okuferamu ssente nga bakozesa obuwanga bw’abafu okusobola okuzzaawo emmaali ye.
Okunoonyereza okukoleddwa Poliisi kulaga nti mu misoni eno balina abaserikale be babadde bakolagana nabo okutiisatiisa abamu ku baggagga b’omu Kampala, nga bakibateekako nti basadaaka abantu, obuwanga ne babuziika mu ttaka lyabwe.

Omugagga Migadde ng'ali mu office ye

Kigambibwa nti abamu ku bagagga ababadde batya okuswazibwa ku bintu by’obuwanga bw’abafu, bazze babawa ssente kyokka Robert Migadde owa Romis, yeeremye era n’abasaba Poliisi enoonyereze ekituufu.
Wiiki ewedde, ekibinja ky’abasajja bano baalumbye ffaamu ya Migadde esangibwa ku kyalo Kabatema mu mu disitulikiti y’e Lyantonde ne bamulumiriza nti naye yaziika obuwanga bw’abafu babiri.
Poliisi okuva e Lyantonde yayingidde mu nsonga zino kyokka ne zibazitoowerera ne basalawo okuziyingizaamu bakama baabwe e Kampala okuva mu kitongole ekikessi ekya Crime Intelligence.

Mig 7(1)

Oluvannyuma baabatutte ku ffaamu ne bababuuza awali obuwanga bwe baabadde boogerako kyokka nga byeboogera tebikwatagana.
 Bambega baawaliriziddwa okubasumulula ku mpingu kwe baabadde ne babakwasa enkumbi basimule obuwanga bwe baabadde balumiriza nti bwaziikibwa ku ffaamu ya Migadde kyokka nga beemagazza.
Ssempala eyalabise ng’ebigambo bimuweddeko, yatulise n’akaaba n’ategeeza nti yabadde yeyiiya asobole okuzzaawo ssente ez’okununula kamupuni ye eya SUS Associates Ltd ekola ebizigo bya Ssemaka Costmetics e Buloba, bbanka gye yatwala gye buvuddeko.
“Maneja nsaba kunsonyiwa, embeera gyendimu yendeetedde okukola bino byonna naye nga ekituufu mbadde neeyiiya nsobole okufuna ssente nziremu okukola,” Ssempala bweyateteezezza.
Poliisi yazudde yabasanze ne lisiti okuli abaggagga abalala be baabadde baagala okufera mu ngeri yeemu.

Ra 5(1)

Kigambibwa nti Ssempala yaliko omukozi wa Migadde ng’amusiigira langi kyokka ne baawukana. Wabula nti azze akola emipango egy’enjawulo okusobola okumuggyamu ssente era lumu yakwatibwa ekitongole kya Poliisi ekya Flying Squad nga kigambibwa nti yalina kyamanyi kubulumbaganyi obwakolebwa ku Migadde mu maka ge  mu Kinaawa mu 2019.
Kigambibwa nti bwebalaba ng’omuggagga abalwisizza okubawa ssente ze baba baagala, bagenda ku Poliisi nebaggulawo ffayiro ne bakulumiriza nti olina obuwanga bw’abafu.
 Kyokka bafuba okulaba ng’omulimu gw’okuziikula gukolebwa kiro basobole okubuwagikawo kubanga bajja nabwo mu bisawo byabwe nga bagamba nti mwebatambuliza ‘Bajjajja’.
 Bwebagenze ewa Migadde, Poliisi yeeremye nti okuziikula kulina kubaawo misana ng’ensi yonna eraba so si kiro kyokka nabo nebakalambira nti empewo zaabwe zisinga kulaba kiro.
Okunoonyereza okukoleddwa kulaga nti bano basooka kulambula kifo we baba bagenda okuzannyira omuzannyo gwabwe.
Bakubira omuggagga essimu ne bamulaaliika nti ali mu buzibu era alina okukola kyonna ekisoboka okwerwanako.

Ra 3

Bwebakuba essimu beeyita bajaasi abali ku ddaala lya ‘Colonnel oba  Major’  nga beefudde abaagala okukutaasa osobole okuva mu buzibu kyokka bwebakwezingako emirundi egiwera nga tovuddeemu kye baagala, awo nga bategeka olukwe lw’okkulumba n’abaserikale nga bwebakulumiriza okubaako abantu bewatta obuwanga n’obuziika mu bifo eby’enjawulo.
Olwalabye nga Ssempala ne banne bye boogera tebikwatagana, Poliisi yabongeddeyo era nebaggulwako emisango gy’okubawa amawulire ag’olimba ku ffayiro namba SD: 24/30/07/21 nga bwe bagenda mu maaso n’okunoonyereza ku ffayiro eyasooka okuggulibwawo eya GEF 082/2021 eyaggulwawo ku kitebe Crime Intelligence e Kololo.
Olwalabye ng’ebintu bitabuse, abasamize nebategeeza Poliisi nti nabo diiru baagibayingizzaamu buyingiza era nebasaba ekisonyiwo.
Ssentebe w’e Lwesaali okuli faamu ya Migadde awaabadde ensasagge yategeezezza nti nabo beewuunyizza nnyo okuwulira nti waliwo obuwanga bw’abafu obwaziikibwa mu kitundu kyabwe kyokka ate olwasimye nga tebabulaba.
Yagaseeko nti Ssempala n’abasamize gwe gwabadde omulundi gwe ogusooka okubalaba ku kitundu. 

To 1(7)

Paasita w’ekkanisa ya Journey of Faith Ministry, Samuel Kiswa yategeezezza nti olwawulidde ensonga z’obuwanga bw’ababafu ku kitundu kyabwe n’agendayo asobole okwerabirako n’amaaso ge nga babuziikulayo kyokka yakanze kutunula nga talaba kawanga konna.
Akulira ekitongole ekikkessi mu ggombolola y’e Kaaliiro mu disitulikiti  y’e Lyantonde, Gerald Batte yoomu ku baabaddewo nga Poliisi etutte Ssempala ku ffaamu ya Migadde okusima obuwanga kyokka nebubula.
Omwogezi wa Poliisi mu bitundu bya Greater Masaka Muhammad Nsubuga yagambye nti guba musango okubuulira Poliisi amawulire ag’obulimba oba okukola ebikolwa ebiba bigenderedde okufuna ssente ku muntu mu ngeri y’olukujjukujju.