Aba bodaboda abaganyuddwa mu ssente za PDM e Mukono bakooneddemu Pulezidenti Museveni ku ky’okumunoonyeza akalulu

Abagoba ba bodaboda abeegattira mu Mukono District bodabodda Sacco basiimye omukulembeze w’eggwanga Yoweri Kaguta Museveni bw’abayambye okwekulaakulanya n’okwegobako obwavu ng’ayita mu kubawa ensimbi mu za SACCO zaabwe ez’enjawulo.

Ssekikubo Ng'annyonnyola.

Steven Ssekikubo ng’ono ye ssentebe w’abagoba ba bodaboda mu disitulikiti eno agambye nti ensimbi ezisoba mu bukadde 100 ezaabaweebwa mu SACCO yaabwe, zibayambye okugula n’okugabira bannaabwe bodaboda 27, ku mukolo gwe baategese okumulaga okusiima kwabwe.

Bano bakooneddemu Pulezidenti Museveni era ne basuubiza okumusaggulira akalulu mu nnaku entono ennyo ezibulayo okulonda kutuuke.

“Twalina abavuzi ba bodaboda abaali mu mbeera embi ennyo, mujjukira ebiseera ebyo ng’aba bodaboda tebasomesa baana, amaka gaabwe nga gayuuga n’ebizibu ebirala naye nga bino byonna byava ku bbula lya nsimbi mu maka.” Ssekikubo bwe yategeezezza.

Yayongeddeko nti bwe baafuna ssente mu Sacco yaabwe essira baaliteeka ku bannaabwe be bamanyi abaali obubi ennyo ne babawa zi bbooda ne babasaba okukola ennyo, era kati amaka gaabwe gabeeyagaza. Yasiimye Pulezidenti Museveni olw’okubalowoozaako.

Amyuka RDC w’e Mukono owa munisipaali eno, Rhonda Tiitwe Kagaaga wano w'asinzidde n’asaba abaaweereddwa zi bboda zino okuzivuga obulungi beewale obubenje naddala eri abo abazikozesa okunoonyeza abakulembeze baabwe obululu mu zi laale ez’enjawulo.

Bo abamu ku bafunye zi bbooda zino, abaakulembeddwa Isa Kakande bannyonnyodde essuubi lye balina mu bbooda zino naddala ku ky’okukola enkyukakyuka mu byenfuna byabwe.