Aba Biva Organic bawagidde Miss ne Mr Bukedde

NG’ESIGADDE nnaku okutuuka ku ntikko z’empaka za Miss ne Mr Bukedde ez’okubaawo nga April 30, 2023, ku Ssande eno ku Theater Labonita, aba Biva Organic health products bavuddeyo ne basasulira abantu 50 tiketi za 1,000,000/= okwetaba ku ntujjo eno.

Dokita Richard Ssenjobe owa Biva Organic ajjanjabisa obutonde n’emmere ssente zebaguzeemu tiketi azikwasizza maneja wa Bukedde ttiivi, Richard Kayiira Ssalongo ku wofiisi zabwe ku Access Building Lubaga road.

Ssenjobe yatendereza Bukedde olw’okuletanga pulogulamu eziyamba abantu okugeza ng’eno eya Miss ne Mr Bukedde gye yagambye nti ekoze kinene okuyamba abavubuka okwezuula n’okufana okwekkiririzaamu.

Kayiira yebazizza aba Biva Organic olw’okuvaayo ne bawagira nga bagulira abantu tiketi n’ategeeza nti ezimu ku tiketi zino zigenda kuwangulwa abantu nga bayita ku mikutu gya Vision Group egy’enjawulo era omuntu kyalina okukola kwekumira ku mikutu gino.

Fayinolo z’omulundi guno zigenda kuba nnyuvu nnyo ng’omu ku basazi b’empaka ye Big Size Bebe Cool ate era ng’agenda nakuyimbira abantu ate bakazanyirizi Maurana ne Regin be bagenda okubeera ba kalabalaba b’omukolo. Okuyingira kwa 20,000/=.

Omuntu ali eyo n’awe osobola okulonda omuntu wo akusingidde ng’oyita ku ssimu yo era akaluluko kajja kumuyamba kubanga abawagizi b’abavuganya bawereddwa omukisa gwa bitundu 60 ku buli 100 okulonda abawanguzi ng’abasazi baakukolera ku bitundu 40 ku buli 100. Abawagizi bagenda kulondera ku ssimu zabwe era omuntu olonda omulundi gumu.

Okulonda genda mu ssimu yo awali messegi owandiike MSNEMRBUKEDDE lekawo Akabanga oseemu enamba y’omuntu wo gwowagira kwavuganyiza okugeza 000 osindiike ku 8008.

Empaka zitegekeddwa Bukedde ttiivi eri wansi wa Vision Group evunanyizibwa ne ku lupapula lwa Bukedde neziwagirwa aba Njovu Estate e Nansana, Life Care Company ltd abakugu mukuyoyoota ensusu, aba Sumz Foods abakola eby’okulya ne Dexe Black Hair Shampoo.

Omuwangizi w’empaka Miss ne Mr buli omu agenda kuvaawo n’ekyapa ky’ettaka n’obukadde 10 ate omuwala n’omulenzi abanaakwata eky’okubiri buli omu afune 5,000,000/=