‘Maama UPE’ agambirweho nk’okozire omwoga muhango omukutunguura eby’obwegyese.

N’ebya Omushaki weitu

RUBAGA

Owabeireho minisita w’eby’obwegyese n’emizaano, Geraldine Namirembe Bitamazire agambirweho nk’omuntu w’emicwe kandi omwebembezi obaire nayetwara, owakozire omurimo gwe n’omutima gumwe kandi n’obwegyendesereza.
 

Arikugambira omu misa y’okushabira omubiri gwe aha kereziya rugaatwa eya Rubaga aharwakabiri ebiro 20.01.2026, Omujwekyerwa wa paapa omu Uganda, Aakibiishopu Augustine Kasujja agizire ngu omugyenzi Bitamazire abaire ari eky’okureeberaho ky’omutaano aha bantu baingi agumize ngu okuba omucureezi omudiini ye kikamuhwera munonga okukora gye emirimo ye.
 

Bitamazire akabaho Omuny'eishengyero-kazi ahabwa disiturikiti eya Mpigi kandi abeeka ye bamugambireho nk’omuntu otwire natiina Ruhanga kandi w’amazima kyahika aha kukora emirimo ye.
 

Minisiture y’eby’obwegyese n’emizaano nabo basiimire omugyenzi Bitamazire ahabw’okutunguura eby’obwegyese akasigaho empangi mpango ahi abandi baatandikiire.
 

Omugyenzi Bitamazire akaheebwa n’ekikubyo ekya ‘Maama UPE’ ahabw’omwoga muhango oguyakozire obu gavumenti etandikaho puroguraamu y’abaana kushomera busha omu mashomero ga purayimare.

Bitamazire afeeriire aha myaka 85 kandi naija kuziikwa eriizooba Orwakashatu ebiro 21.01.2026 omu maka gye omu disiturikiti eya Butambala.

#WestUpdates