Gavumenti kushohoza puroguraamu y’okuziika omuramuzi Amoko eriizooba.

N’ebya Beth Akatukunda

Gavumenti ney’okwija kushohoza puroguraamu y’okuziika obaire ari omuramuzi wa kooti enkira zoona, Stella Arach Amoko eriizooba. 

Omugambirizi w’ekitongore ky’oburamuzi, Jamson Karemani, naagira ngu akakiiko akarikutebekanisa eby’okuziika akarikwebembera omuhandiiki w’entura omu ofiisi ya Purezidenti, Hajji Yunus Kakande nikaija kubuganaho naba famire y’omugyenzi Arach kutaho puroguraamu ensya ey’okumuziika.

Ekitongore ky’oburamuzi kibaire kyashohoize puroguraamu y’okuziika omuramuzi beitu ekaija yayemerezibwamu bwanyima y’okugiraho obutaikirizana aha mwanya ogu arazikweho. 

Obutaikirizana obu bubaire buri ahagati y’abanyabuzaare b’omuramuzi, abaana be n’omushaija we, Ambassada James Amoko Idule.

Abanyabuzaare b’omuramuzi n’abaana be babaire nibenda ngu aziikwe omu disiturikiti ya Nebbi kandi omushaija we abaire nayenda ngu bamuziike omuri Adjumani nainga omu mwanya ogundi ogu embaju zombi zitaineho kakwate.

Eki kikareetera abaana kwirukangira omu kooti kubahwera kugonjora enshonga ezi kandi kooti ebaire ekuriirwe omuramuzi Ketrah Kitariisibwa Katunguka ecwiremu ngu aziikwe omu maka g’abazaire be omu disiturikiti ya Nebbi.

Okurugiirira ahari Karemani, orukiiko rw’okutebeekanisa eby’okuziika omuramuzi Amoko nirwija kwetabwamu omuhandiiki w’ekitongore ky’oburamuzi, Pius Bigirimana, omuhandiiki mukuru Sarah Langa Siu, abajwekyerwa kuruga omu kitongore kya Pooriisi n’ekya UPDF.

Purezidenti Yoweri Museveni aragiire ngu omuramuzi Amoko aziikwe gavumenti kandi omu kitinisa. 

Omuramuzi Amoko, 69, akaitwa endwara y’ekookoro ah’eirwariro erya Nakasero omuri Kampala.

#WestUpdates