Abantu 86 bafeereire omuri butandu omu wiiki emwe

N’ebya John Masaba

Abantu 86 nibagambwa kuba bafeereire omuri butandu z’ahanguuto wiiki ehwaire.

Abantu 380 bahutaire kandi bariyo nibajanjaabirwa omumarwariro gatari gamwe omu eihanga, kurugiirira ahamugambirizi wa pooriisi ey’eby’ahanguuto, Michael Kananura.

Kananura yaagira ngu butandu ezi zibaireho ahagati y’ebiro 23/6/2024 kuhitsya ebiro 29/6/2024.

Omuri aba, 28 babaire nibatamburira ahabigyere, 27 abavugi ba piki kandi 12 abashabazi ahari piki. Abandi 11 babaire nibatamburira omumotoka kandi ahari 5 abafiire babaire bari ba dureeva.

Ebi Kananura yaagigamba eriizooba omu rukiiko rw’ab’eby’okwerinda orwa buri wiiki ahakitebe kikuru kya pooriisi omuri Naguru Kampala.

Ogu nayegyekyerera butandu ezi okuvugisa ekimama.

#WestUpdates 
#RadioWestAt25